Obama le Hillary nih Khrihfa nakin Muslim an ttanh deuh hna

Obama le Hillary nih Khrihfa nakin Muslim an ttanh deuh hna

US President hlun Barack Obama le president aa cuh balmi Hillary Clinton nih New Zealand muslim biakinn lainawn kong le Sri Lanka khrihfa biakinn lainawn kong an ttialmi zoh tikah muslim an ttanh deuh ti a lang.

Khrihfa ttanh deuh hna seh, ka ti duhnak si lo. Aa tluk tein an chimrel ding le an ttial ding si.

March 15 ah Australia Mirangpa nih New Zealand muslim biakinn 2 ah minung 50 a thah hna lio ah Hillary Clinton nih hitin a ttial.

“New Zealand le ramkip muslim vialte caah ka lungkuai. Muslim huatnak le miphun theidannak lungput vialte hi kan doh peng hrimhrim a herh.

Mirang a ttanhmi ralhrang pawl cu hruaitu hna nih hmun zakip ah sual an phawt hna hrimhrim ding asi. Mithah duhnak in a khatmi an huatnak nun hi donghter hrimhrim a herh,” a ti.

A ttialmi cu ttha taktak. Ahopaoh kan lungtling.

Nain, April 21 i Thawh Ṭhan Ni ah biakinn 3 ah Pathian thangṭhat mi pawl muslim ralhrang nih bomb an puah hna. Mirang (ramdang Khrihfa) an tamnak hotel 3 zongah bomb an puah i minung 359 an thi, adang 500 leng sizung an phan. Mah kong a ttialmi hi zoh hmanh.

“Huatnak le buainak doh dingin kan dihlak kan i lungrual hrimhrim a herh. Tuni i Sri Lanka ah Thawh Ṭhan a thangṭhatmi pawl le khualtlawng pawl tuksapur in an thahmi hna nih harnak a pekmi vialte thla kan campiak hna,” a ti.

Aa dan tuk ning nan hmuh cio ko hih;

  • ‘Vawlei cung muslim vialte caah ka lungkuai’ a ti lio ah Khrihfa an thih tik ahcun “Thawh Than a thangṭhatmi” a ti salam hna. Khrihfa a ti duh bak hna lo.
  • ‘Muslim a huami le miphun a thleidangmi kan doh hna a herh’ a ti lio ah Khrihfa a zaza a thattu pawl cu ‘kan doh hna a herh’ a ti duh lo.
  • Muslim a thattu Mirangpa cu “Mirang a ttanhmi ralhrang” a ti nain Khrihfa a thattu muslim pawl cu “ralhrang” a ti duh hna lo.
  • Adang bia kal ning tete zong zoh hmanh uh, a letlet bakin muslim a ttanh deuh hna.
Mirang pawl zong nih Hillary Clinton cu mah kongah an mawhchiat taktak ve i “na ca ttialmi kan remh piak” tiin mah hmanthlak hi an comment.

Obama nih New Zealand i muslim 50 thah an ton lio ah hitin a ttial ve.

“Michelle [a nupi] le kei nih New Zealand mipi kan in ngaihchiatpi hna. Nanmah le Muslim pawl nan ngaihchiatnak kan in tuarpi hna. Huatnak paoh cu kan dihlak in kan doh hrimhrim a herh,” a ti.

Sri Lanka khrihfa 359 muslim nih an thah hna vial ahcun ‘khrihfa nan ngaihchiatnak kan tuarpi hna’ a ti duh bak lo. Khrihfa ti hrim a chim duh lo i ‘Thawh Than a thangṭhatmi’ tiin a auh hna.

Muslim 50 an thah hna lio ahcun “huatnak [lainawng] paoh cu kan dihlak in kan doh hrimhrim a herh” a ti nain Khrihfa a zaza muslim nih an thah hna vial ahcun ‘lainawng muslim pawl cu kaa khat hmanh a mawhchiat hna lo’.

An ca ttial daan hi Khrihfa nakin muslim an ttanh deuh hna ti na ruat ve maw? Comment…

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.