PSG arfi Neymar nih a ka tlaihhrem tiin Brazil model Najila Trindade nih taza a cuaimi cu tehte tling a um lo ruangah an khar cang.

Najila Trindade (kum 26) nih May 15 ahkhan Paris khuapi i hotel pakhat chungah Neymar nih a ka velh pin ah a ka tlaihhrem tiin biaceih zung ah tazacuainak ca a rak ap.

Nain, Neymar nih cucu a dik lomi a si a rak ti ve.

“Neymar tlaihhrem case kongah kherhlainak a tuahtu Brazil palek nih tehte a tling lo an ti caah an khar,” tiah Sao Paulo sihni zung nih a thanh.

Neymar cu Champions League puai 3 an bar

“Paris St-Germain le Brazil team hi ka uar tuk hna. Cun, Neymar he nupa sinak tuah ka duh. Neymar nih Paris kalnak vanlawng ticket man le hotel man a ka liam piak. Instagram in aa theimi kan si,” tiah Najila Trindade nih palek sinah a chim.

“Palek nih Neymar case an kharmi cu tazacuaitu sinah kan kuat lai. Tazacuaitu nih palek thawngthanh bantuk in case an khar lai maw a siloah thuk deuh in dah an kherhlai lai ti cu ni 15 chung ah bia an khiah lai. A donghnak cu biaceih bawi (judge) nih a hruai lai,” tiah Sao Paulo sihni zung rianttuan pakhat nih a chim.

Brazil rammi tampi zong nih Neymar cu a sual lai lo an ti.

Mah kongah Neymar a pa Neymar dos Santos nih “ka fapa hi sualnak ngeilomi a si. Video hna a thlakmi hi cu minu nih hin timh ciammam tein rawi a timhmi a si ti a lang” tiah a chim ve.