Myanmar sinum nu hrem ruangah Singapore nuva thongtla

Singapore nuva hna cu an sinum Myanmar nu an hrem tuk caah le Kawlram i a chungkhar tiang thah dingin an tlerh caah thong an thlak hna.

Moe Moe Than, kum 32 cu rawl tlawmte lawng an pek. Zunput kal zong an sianh tawn lo, mi sin na chim cun Myanmar ram i na chungkhar kan thah hna lai tiin an tlerh peng.

Chia Yun Ling cu nizaan ah biaceihtu Olivia Low nih kum 3 le thla 9 thong a thlak pinah tangka a liamter chih.

A vapa Tay Wee Kiat cu kum 1 thong a thlak ve.

Moe Moe Than hi tangka nan liamh lai, tiah bia a khiah chih rih.

Moe Moe Than cu 2012 ahkhan hi hna nuva sinah rian a rak ttuan. Nuva hna nih an hrem ning vialte cu palek le cozah sihni nih an hlat dih hnu ah sual case 20 bakin taza an cuai hna.

“Moe Moe Than cu an sinah a ttuan chung vialte timh ciammaam te le ngol loin an hrem peng. A taksa he a thinlung he an hrem,” tiah biaceihzung cazin ah aa ttial.

Singapore nu Chia nih buh le cini a cawh i Moe Moe Than a kaa ah peeng in a rawn. “Ka paw ttam tuk” a ti ruangah hitin a tuahnak si. Rawl ei an sianh tawn lo caah a paw ttam tuk lengmang.

Moe Moe Than nih a celh lo caah aa hak, zunput ah a tli i aa luak. Chia nih a dawi i a hro, a bengh chih.

“Plastic chungah a luakter hnu ah aluak cu a eiter.”

Mah hna nuva hi an sinum Indonesia nu an hrem tuk ruangah kum 2017 zong ahkhan a vapa cu kum 2 le thla 4 le a nupi cu thla 2 thongdan pek cangmi an si. Mah ca zong cu thongthlak chih an si lai.

Singapore ram ahhin ramkip in a rami sinum 250,000 hrawng an um. A si khawh chungin cozah nih a ven hna, a hremtu an boss te cu atu bantukin cozah nih taza a cuai hna i thong a thlak peng hna.

February zong ahkhan, sammehnak dawr manager a ttuanmi Singapore nu le a vapa cu ‘an sinum Myanmar nu hramhram in tisa an toihter i a taksa a kangh dih’ caah thong an thlak ve hna. — AFP

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.