Myanmar sinum nu a nahchuah ruangah kum 3 thongthlakmi Indonesia nu

Myanmar sinum nu a nahchuah ruangah kum 3 thongthlakmi Indonesia nu

Singapore ram ah sinum rian a ttuanmi Indonesia nu nih sinum rian a ttuan vemi Myanmar nu cu a nahchuah caah Myanmar nu boss fate din awk Formula ah chapiat dip a cawh.

Mah lio ahhin Myanmar nu boss fate cu thla 3 lawng a si rih. Indonesia nu nih Myanmar nu nak in ka rian har deuh tiin a ruah caah nahchuah in rawi a timh.

Kum 29 Indonesia nu cu tuni September 20 ah biaceih zung nih kum 3 thongthlak dingin bia a khiah piak.

Indonesia nu hi bawhte i a uncle sin ah kum 3 le cheu sinum rian a ttuan cangmi a si. Myanmar nu hi bawhte nulepa i an sinum a si. Inn khat ah an um tti hna.

Ni kum September 6 ahkhan Indonesia nu nih a thli tein coka ah a ummi bawhte din awk milk powder cu a lak i refrigerator cung ah a thuh.

Thil a tteih dih hnu ah fridge cung i milk powder cu a lak i innkhan tikholhnak khan ah aa luhpi. Milk powder cu chapiat dip phun 2 he a cawh. Cu a cawhmi cu Karihome Goat Milk Infant Formula bawm chungah a rawn.

A thaizing ah, bawhte cu a tah caah a nu nih milk powder a tuahpiak. A nu nih milk powder a phiomi cu a thek. Mah ahcun, dur tune ah pink le a nakmi tlang tete a hmuh.

Mah ahcun a dang pakhat a thar in a tuah tthan i dur tune ah blue rong tlang tete a hmuh tthan. Formula bawm cu a hon i a nimh tikah a hmuimi le chapiat haw a theih. Mahni ahcun a fate cu amah hnuk a dinh.

Bawhte chungkhar nih thil sining an hlat. Milk powder an cawknak dawr tiang an va hlat. Bawhte uncle nih palek a chawnh hna i Indonesia nu cu an tlaih.

“Myanmar nu (kum 25) cu bawhte lawng a zoh sawhsawh. Mah ahcun, kei cu inn chung rian vialte ka ttuan dih. Cu caah, Myanmar nu cu harnak tong seh tiin milk powder ah chapiat dip ka peihnak a si,” tiah Indonesia nu nih aa phuan.

Karihome Goat Milk Infant Formula bawm chung i milk powder cu Ngandamnak Zung nih an check i chapiat dip aa cawh ko tiah an fehter. – CNA