‘Myanmar Sat 2’ cuṭuh cu August 7 ah an thlah cang lai

  • Myanmar ram chung TV, phone le internet line a ṭha deuh cang lai
  • Myanmar cozah nih tangka $155.7 million a dih

Myanmar Sat 2 (Intelsat 39) cuṭuh cu France khualipi Paris um ‘Arianespace’ timi rocket thlahnak hmun in August 7 deihlan 2am ah an thlah cang lai.

July 24 ah thlah dingin rak timh asi nain Arianespace in thlahmi Italy ser rocket cu an thlah hnu minutes 9 ah a rawk i a puah dih caah August 7 ah an thawn hi si.

“Myanmar Sat 2 cu thlah dingin Intelsat nih a check dih cang. Myanmar caan in cun August 7 deihlan 2am ah an thlah lai. Zeizong vialte tlamtling tein timh dih asi cang tiah phungning tein thawng a kan thanh cang,” tiin U Win Aung, Lamsul le Pehtlaihnak Vuanci Zung tangum Cuṭuh Pehtlaihnak Zung i engineer lutlai nih a chim.

Mah cuṭuh cu Intelsat company nih a sermi asi. Intelsat cu America cozah nih rak dirhmi asi nain kum 2001 thok in private company asi cang. Atu cu Luxembourg ram ah headquarter an chiah.

“Intelsat company he kan i bawm kan ti ko nain, kanmah Myanmar ram nih ngeihmi cuṭuh asi kan ti khawh. Anmah nih a kan tuahpiak ding cu an tuah dih cang, kanmah ta a sinak kan tuah ding zong kan tuah khawh ko lai. Kan ram min bunhnak nawl zong kan ngah,” tiah U Win Aung nih a chim.

Myanmar Sat 2 cu Myanmar cozah le Intelsat nih a cheu veve in an ngeihmi cuṭuh asi, kan ram nih ramdang sinah tangka a hmanmi zor deuh seh, ramchung chawlehnak ṭhangcho deuh seh, fim cawnnak, ngandamnak, mipi ṭhanchonak le adangdang ah a lamkip in ṭhangcho deuh usih ti ruahchannak in an tuahmi asi.

Myanmar Sat 2 cu kum 15 tatṭan asi i 2019 October 1 thok in a tatṭan a dih tiang Myanmar cozah nih a hman lai. Cuṭuh kilven rian cu Intelsat company nih ṭuanvo a lak lai.

Myanmar Sat 2 cu signal kuatnak (Transponder) C-band 6 le Ku-band 6 an um i 432 Mhz veve (adihlak 864 Mhz) a si.

Myanmar Sat 2 cu tangka $155.7 million a dih. 2018 ah Myanmar cozah nih 30% a liam cang. 2019 ah 50% a liam tthan lai i a taangmi 20% cu 2020 kum dongh ah a liamte lai.

Myanmar Sat 2 cuṭuh cu chanthar technology ṭha in sermi asi caah TV, phone le internet line a chiatnak lam hla khuate pawl ah line a ṭhatter deuh lai.

Myanmar cozah nih nihin tiang amah lawng in cuṭuh a ngei kho rih lo. Ngeih khawh dingin aa zuam cuahmah lio asi i a tlamtlin khawhnak ding rianṭuannak caah Myanmar Sat 2 hi an hman lai.

Myanmar cozah nih Intelsat company sinah kum 5 ca in a hlanmi 360 Mhz cuṭuh ‘Myanmar Sat 1’.

Kum 2016 May 27 ahkhan Intelsat company cuṭuh 360 Mhz cu Myanmar cozah nih kum 5 sachoh in a rak hlan i “Myanmar Sat 1” tiin min an bunh. Cuṭuh hman khawhnak ding ahcun;

  • a ngeitu company sinah hlan
  • mi he ngeih ṭi le
  • a ningin ngeih, tiah phun 3 a um. 3nk hi Myanmar cozah chunmang asi. Asia ram tampi nih cun anmah tein cuṭuh an ngeih len cang (India lebang cu anmah tein thlapa cungah rocket kuat an timh hoi cang) nain Myanmar cu Ralkap ruangah kum sau tuk hnu a khar.

Myanmar Sat 1 cuṭuh zong cu France khualipi um Arianespace in rocket in an rak thlah vemi asi.

Myanmar cozah nih 2017 January 25 ah Myanmar Ngeihmi Cuṭuh ser khawhnak dingah komiṭi a rak dirh. Komiṭi ahcun minung 13 a chiah hna i Vice President U Myint Swe nih a hruai hna.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.