Myanmar Idol season 4 hlasak zuamnak cu a rauh hlan ah an tuah than cang lai.

“A rauh hlan ah Myanmar Idol Season 4 hlasak zuamnak kan thok tthan cang lai. Biakhiaktu ah mipi nih uar ngaimi Myanmar Pyi Thein Tan cu aa tel ti lai lo,” tiah Executive Producer Aung Phyu Win nih a chim.

Atu kum Myanmar Idol hlasak zuamnak caah biakhiaktu ding hna cu Tin Za Maw, Director Aung Let le Phyu Phyu Kyaw Thein an si lai.

“Biakhiaktu kan zorter tikah biakhiaktu hi minung 4, 5 an si lai timi phung a um lo. America Idol ahcun biakhiaktu 5 tiang zong an um ko. 3 lawng zong a um caan um ko. A khuah (2,4) cu Yes/No caah a tlamtling lo, cu ruangah a pak (3,5) hman a hau,” tiah Aung Phyu Win nih a chimchap.

Myanmar Idol i season pahnih ah biakhiaktu si mi Pyi Thein Tan cu tu kum ah aa tel ti lai lo caah a phunzaimi mipi cheukhat an um.

Myanmar Idol hlasak zuamnak ahhin biakhiaktu ni top 10 tianglawng thimnak an tuah lai. Top 10 silole top 11 cu Live in hlasak an i zuam bakin mipi vote pekmi in thim an si lai.

Myanmar Idol Season 4 hlasak zuamnak i aw hneksaknak (audition) cu June 15 ah Taunggyi in an thok lai. Mah hnu ah Mandalay, Taungoo, Hpa-an le Yangon ah an pehzulh te lai.

Tu kum Myanmar Idol hlasak zuamnak i winner laksawng cu MMK ting 500 le Moon Myanmar Media nih album pakhat chuahpiak a si lai.

September thla hrawng in khin Ningani zaan fatin TV Channel le Myanmar Idol Faceboo Page ah an i zuamnak video zoh khawh si lai. December thla ah Grand Final an i zuam te lai.

Myanmar Idol hlasak zuamnak ah winner ngahtu 3 an si cang. Saw Lah Htaw Wah, Thar Nge le Phyo Myat Aung hna an si. _ The Irrawaddy