Myanmar ram in MMA fighter Bozhena Antoniyar le Vietnam ram in MMA fighter Bi Nguyen cu July 12, 6pm ah Master of Destiny timi tlangtar in Malaysia ram ah an i phomh lai.

MMA atomweight simi Antoniyar cu atu hi Malaysia ram ah a um cang. Bi Nguyen he Kuala Lumpur i Axiata Arena stadium ah aa phomh ding an si.

“Vietnam- American Bi Nguyen cu tthuat a thiam ngaimi a si. Mi chuih a thiam lawng siloin mi tlaih zong a thiam. Keimah nakin a thiam deuhmi a si caah kan i tthuat tik ah kaa ralrin ngai a hau,” tiah Antoniyar nih a chim.

March thla ahkhan Antoniyar nih Thailand nu Audreylaura Boniface cu Myanmar ram ah a rak tei.

“Atu tan i tthuatnak ding caah thla 2 chung timhtuahnak ka ngei. Nikhat hnu nikhat mah le mah zumhnak ka ngei chin lengmang”.

“Malaysia ram ah Myanmar mi tampi an um. Axiata Arena ah an rak rat i an ka aupi ahcun lunglawmhnak pakhatkhat cu ka pek ko hna lai”.

“Keimah he aa tthua dingmi nu hi a thiam tukmi a si tik ah ka caah a har ngaimi a si ko nain Myanmar mi pawl nih rak ka ttanh hna seh ti ka duh. Ka ram caah teinak hmuh ka duh”.

“Ka nun chungah harsatnak tampi ka ton nain zeitik hmanh ah ka lungdong bal lo. ‘Zeithil hmanh ah ka lungdong lai lo’ tiin keimah le keimah thazaang ka pe zungzal. Ka ram (Myanmar), ka miphun le ka chungkhar nih an ka ttanpi lai tiah zumhnak ka ngei i an caah teinak hmuh ka duh,” tiah Antoniyar nih a chimchap.