Terminator lemcang Arnold Schwarzenegger (kum 71) cu a fan pawl he nuam ngai in selfie aa thlak len lio ah a hnu lei in mipa pakhat nih zuan pah in a lamh lio video cu online ah a lar ngaingai.

Arnold Schwarzenegger cu naite ahkhan South Africa ram ah a tlawng i Johannesburg khuapi um ngakchia gym tuahnak puai a zawh lio ah atu bantuk in chuih/lamh a ton hi a si.

A chuihtu pa cu Arnold hnulei ah a dirmi bodyguard Mr. Universe hlun nih a tlaih colh ve. Mah ahcun mipa cu “ka bawm, Lamborghini motor ka duh” tiin a au len.

California Governor hlun Arnold nih an hnulei in an lamh/chuihmi cu video a hmuh hnu lawng ah aa theih. A lamh/chuih lio ah pah sual le mi en phun sawhsawh ah a ruah.

“Keimah kongah a lungretheimi nan cung ah kaa lawm. Ka zeihmanh ti lo. Mipi nih an ka enmi ah ka rak ruah nain a rak zual tuk hita.”

“Nanmah bantuk in video ka hmuh hnu ceo lawngah a ka lamh/chuih mi a si ka theih. Mihrut pa nih ka Snapchat ah hnahnawhnak a ka pek lo caah lawmh awk um ngai,” tiah Arnold nih a Twitter ah a ttial.

Arnold chuihtu pa cu palik sinah an ap. Nain, Arnold nih mipa cu tazacuai a tim lo. _ The Sun