Mindat khua ah 3.7 billion kyats in ‘College of Arts and Sciences’ an sak lai

Zahan ah tuahmi Pyithu Hluttaw meeting ah Fimcawnnak Vuanci changtu nih ‘tangka ting thong 37 leng dih in Mindat khua ah College of Arts and Sciences’ kan sak lai, tiah a chim.

September 13 ah tuahmi Pyithu Hluttaw meeting ah Mindat peng MP U Nay Lin Aung nih, “Mindat khua ah College of Arts and Sciences sak nan tim maw?” tiah a hal.

Fimcawnnak Vuanci changtu U Win Maw Tun nih, “Mindat khua ah College of Arts and Sciences sak kan timh i hmun zong kan ngah cang,” tiah a leh.

“2019 – 2020 Budget Kum ah tangka 1264.640 million kyats in cacawnnak inn dot 2 pahnih le 547.20 million kyats in saya/ma inn dot 2 pahnih kan sak lai.

“240 million kyats in khaan 6 komh dot 1 inn pahnih cu vuantthan inn cah kan sak lai. Siangngakchia 100 tlum siangngakchia inn 2 cu 1312 million kyats in kan sak lai. Ti, mei le hmun tuahnak caah 390 million kyats hman dingin bia khiah dih asi cang i Chin state cozah he i bawm in rianttuan kan thok cang,” ati.

Mindat khua i college cu zei tik dah on le cacawn thok asi lai, tiah a hal chap.

“College sak rian cu simanking kum ningin a dotdot in ttuan asi, a ran khawh chungin kan in tuahpiak hna lai, nain tangka hman ding kong hi Chin state cozah he voi 1 i ceih tthan hnu lawng ah pehzulh khawh ding asi,” tiah a leh.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.