Min Aung Hlaing nih Khrihfa le Muslim sinah tangka le rawl a hlut hna

Min Aung Hlaing

Myanmar ralkap bawi Min Aung Hlaing nih Nithumni ahkhan Mandalay ah a ummi Khrihfa le Muslim sin ah tangka le rawl a hlut hna.

“Ralkap bawi Min Aung Hlaing nih Chanayethazan Township ah a ummi Muslim sianginn le Aungmyethazan Township ah a ummi Catholic biakinn ah tangka le rawl a hlut hna. Cun, Bhamo le Ma Soe Yeik ah a ummi phungki sianginn zongah a hlut hna,” tiah ralkap lei biachimtu ralbawi Zaw Min Tun nih a chim.

Min Aung Hlaing nih Khrihfa le Muslim sin i a hlutmi cu tangka 9.5 million kyats (US$6,220 hrawng), facang tun 140, chiti, pe le cite hna an si.

Atu tan hi Myanmar ralkap nih Buddhist a silomi Khrihfa le Muslim sin ah thil an hlut avoi 2nk a si. August thla zong ahkhan Pyinmana Township ah a ummi Khrihfa le Muslim sin ah thil an hlut bal cang.

“Kawlrammi vialte hna nih zei biaknak ti um loin ram an dawt dih i, ram tthanchonak caah an i lungrual khawh nak hnga, hmuitinh in a hlut hna hi a si,” tia ralbawi Zaw Min Tun nih a chim fawn. – The Irrawaddy

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.