Malaysia: September 10 chuak muichia ‘iPhone 11’ cu September 27 ah cawk khawh si lai

Apple company nih September 10 ah onnak puai a tuahmi iPhone 11 cu Malaysia ram ahcun September 27 lawngah cawk khawh asi te lai.

US ram ahcun September 13 in cah-chung (pre-order) a ngah cang i September 20 ah dawr ah cawk a ngah lai.

Apple nih iPhone 11 cu phun in a chuah;

  • iPhone 11 = camera 2, ahmai letmah 6.1 kau (iPhone XR update)
  • iPhone 11 Pro = camera 3, ahmai letmah 5.8 kau (iPhone Xs update)
  • iPhone 11 Pro Max = camera 3, ahmei letmah 6.5 kau (iPhone Xs Max update)

An sehtha cu aa khat dih, A13 bionic chip lawngte si lai. Ni kum chuak iPhone X kha A12 chip asi. An pungsan cu ni kum chuak iPhone he aa khat dih cikcek nain camera design balte aa dang.

Apple headquarters ah an chiahmi iPhone 11

Tutan chuak iPhone camera design cu a muichiat ning hi chimpit bak si. Liamcia kum 4 in nihin tiang a chuakmi phone design vialte lakah a muichia bik si.

Cun, Samsung, Huawei, Oppo, tbk., pawl nih cun ahmailei cal sam pi kha an telh ti hna lo nain tutan chuak iPhone ahcun mahpi kha a um peng tthiam rih. A phei in game i celh le video zoh lebang ahcun a cal sampi nih tamlak a phenh i sivang taktak.

Ni kum chuak iPhone he zei pipa aa dang lomi phone hna chuah i zuar tthan cu Apple company hi ningzah a hngal lo taktak. Nain, annih cu cawngia an tthawng tuk i mi tampi nih an cawk hoi ko lai. Samsung nih cun hi bantuk zei huaha aa dang lomi phone chuah sehlaw a zuar kho lai lo. Apple hi zei pipa a si lomi thil in mi lunglak an thiam ngai, ngapih bantuk an si.

Mah tluk camera muichiat khawh cu – iPhone 11 Pro asi.

Tutan chuak iPhone pawl cu ni kum chuak nakin suimilaam 1 in 5 tiang battery sau deuh an nguh lai.

‘Kaupi thlaknak’ caah 12MP camera an bunh. A hmeilei camera 7MP zong kha tutan chuak iPhone cu 12MP lawngte an si dih. Nain, Samsung le Huawei phone pawl cu ni kum pi khan 12MP camera lawngte an si cang. Thil thar asi lo.

An man cu atanglei bantukin si lai;

  • iPhone 11 (64GB) = RM3,399 [128GB = RM3,599, 256GB = RM4,099]
  • iPhone 11 Pro (64GB) = RM4,899 [256GB = RM5,599, 512GB = RM6,499]
  • iPhone Pro Max (64GB) = RM5,299 [256GB = RM5,999, 512GB = RM6,899]

iPhone 11 cu color 6; White, Black, Green, Yellow, Purple le (Product) Red tiin a chuak.

iPhone 11 Pro le Pro Max cu color 4 veve; Space Gray, Silver, Midnight Green le Gold tiin an chuak.

September 10 ah tuahmi ‘iPhone 11 onnak puai’ ah a kalmi PC Magazine media nih Apple headquarters ah iPhone chuak thar pawl an tongh lio VIDEO

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.