23.9 C
Hakha
Monday, June 1, 2020

Malaysia RC le ramdangmi nih Cheras um Chinmi rawl an bawmh hna

- Advertisement -

Malaysia ram, Cheras khua um Chin chungkhar 120 (milu 700 hrawng) cu Malaysia RC Khrihfabu le ramdangmi nih rawl tlawmpal cio an bawmh hna, tiah kan theih.

Coronavirus zawtnak karh hlah seh tiin Malaysia cozah nih March 18 in April 14 tiang lengchuah a phih caah hohmanh rianṭuan khawh asi lo. Mah ruangah Chin refugee pawl an har tuk lai tiin an bawmh hna hi si.

Mah kong he pehtlai in, The Chin Express nih Cheras um Chin Christian Fellowship (CCF) Chairman Pu Khar Ceu kan chawnh i, “kan hnu zarh ah RC khrihfabu nih facang, chiti, arti, ngakuang, piat, aalu, vankhawng, tbk., pawl a kan bawmh,” tiah a chim.

“Cheras ah RC mi bawm pa aa choklet in a bawmh pah hna, kan inn ah a ra i thil sining aa ka hal. Cheras um Chin refugee min cazin la law ka khrihfabu ah kan chimhpiak hna lai aa ka ti i cutin RC khrihfabu nih a kan bawmh hi si.

“Cheras ahhin Laimi chungkhar 120 (milu 700 hrawng) kan um. Khoh 1nk cu bawmhnak kan ting pah dih ko. A har deuhmi pawl cu khoh 2nak zong an ting. Facang hi cu ṭhoh 1 cio kan ting pah dih ko. Chiti, arti, piat, vankhawng, ngakuang, tbk., mehmuai bal hi cu a tlawm deuh caah a har deuhmi lawng kan phawt hna.

“Chin Student Organization (CSO) zong nih Cheras um Chinmi a kan bawmh. Khoh tam nawn a kan bawmh. Biakinn ah kan khon i a tam deuh hnu ah kan phawt hna. Khoh 1nk kan phawt ahhin cun kan dihlak in kan ting pah dih. Khoh 2nak cu a harsa deuhmi lawng kan phawt hna,” tiah a chim.

CSO Chairman Saya Tawk Lian Sang kan chawnh i, “rawl a harmi chungkhar an um caah ka hawile, le Nestle le Lion Clubs company, le Every Nation Church sinah bawmh ka halpiak mi hna asi,” tiah a chim.

“Bawmhnak an hmuhmi cu hmasa ah keimah lawng in chungkhar 30 hrawng ka phawt hna nain, Cheras um Laimi cu CCF upa nih an theih deuh hna caah hnu ahcun bawmhnak phawt cu CCF upa kut ah ka hluai i keimah cu bawmhnak hal lawng ka tuah, cucaah atutiang chungkhar zeizat dah an ting cang ti ka hngal lo. CCF upa nih an hngalh cem lai.

“Bawmhnak cu facang, chiti, vankhawng, piat, anṭam, copi, milk powder, ngakuang, aalu, khayianchinti, peti (bailep), aihre, salat, broccoli, tbk., pawl an si.

“Ka hawile (Malaysia, Germany, Canada le ramdangmi) nih tangka RM3,000 hrawng zong an ka kuat i mehmuai cawknak tangka a har deuhmi chungkhar tlawmpal cu market ah an herhmi ka cawkpi hna.

“Atu zong tangka cu tlawmpal a taang rih, cun tlawmpal zong kuat chap an ka timh nain minung pakhat lawng market kal khawh asi caah keimah nih zulh cu ṭihnung ngai i a harsa deuhmi chungkhar zeimawzat cu mehmuai cawknak tlawmpal cio ka phawt hna lai. Receipt pawl cu bawmtu sinah ka ap te lai.

“Tuni zongah bawmhnak tlawmpal a phan ṭhan. Thaizing zong ah bawmhnak tlawmpal a ra rih lai. Cun, mah hnu zongah tlawmpal cu a ra rih lai,” tiah a chim.

Malaysia le India um Chinmi cu rianṭuan kho loin inn chungah i erh cio asi caah rawl cawknak le inn man peknak tangka an harsa ngai cio hna. Acunglei kan langhter bangin Malaysia cu ramdang khrihfa pawl nih rawl an bawmh pah hna, nain inn man pek awk cu an har ṭhiam ko.

Malaysia cu US le Australia bantukin thla 1 ah $3,000 hrawng hlawh khawh asi lo. RM1,200 in RM2,000 kar hi Chinmi zaraan nih an hlawhmi asi. Fa a ngeimi tam deuh cu an vale lawng rian an ṭuan khawh caah a nung fangfang an si, khon awk an ngei lo. March 18 in April 14 tiang (thla 1 chung) ṭuan lo ahcun an har ngai.

Puchong um Chin chungkhar 100 zong Malaysia khrihfabu nih rawl tlawmpal cio a bawmh hna – mah hi hmet law rel khawh asi.

- Advertisement -

Ṭial Tharmi

Ramdang khrihfa nih ACR sin in Chin ralzaam tampi an bawmh hna

Dawtnak ngei ramdang khrihfa pawl nih Malaysia um Chin ralzaam tampi caah ACR (Alliance for Chin Refugees) sinah bawmhnak an pek, tiah...