Malaysia Ramchung Vuanci Zung nih “phungninglo minung an ram cio kuatnak programme thar kan tuah. Tu kum dongh tianglawng caan kan pek lai,” tiah tuni ah thawng a thanh.

“Phungninglo minung an ram kuat tthannak programme cu ‘Program Back For Good’ tiin min an pek i August 1 in December 31 tiang kan on lai,” tiah Malaysia Ramchung Vuanci Tan Sri Muhyiddin Yassin nih a chim.

“Malaysia ram ah phungninglo in a ummi pawl cu anmah lungtho tein lahwahkah zungah rak ra hna sehlaw RM700 lawng an liam lai i an ram ah an tlung kho lai”.

“Amah balte, anmah ram tanzung cio ah passport silole visa an lak hau lai. Culawng siloin, an ram tlun/kirnak vanlawng man cu anmah tein an i liam lai i, ni 7 chung hrimhrim ah an kir lai,” tiah Malaysia Ramchung Vuanci Tan Sri Muhyiddin Yassin nih tuni ah a chim.

Hi programme cu Malaysia Lahwahkah lawnglawng nih a tawlrel lai, Agent silole a bawmtu tibantuk zeihmanh an um lai lo. Cun, mah programme cu Peninsular Malaysia silole West Malaysia lawnglawngah tuah khawh a si lai.

“A hlan zongah phungninglo minung an ram kuatnak ‘3+1 amnesty programme’ kan tuah i a tlamtling ve ko nain, Malaysia ram chungah phungninglo minung an tam tuk rih tthiamtthiam”.

“Ram chungah phungninglo minung zeizat dah an um ti cu ka hngal lo nain, an ram ah kir tthannak caanttha kan pek hna. Malaysia ram ah ra ti hna hlah seh. Ka kuat cangmi hna cu blacklist ah kan chiah hna lai”

“Cun, atu programme hi a luancia bantuk khan caan sauhpiak a um ti lai lo. Thla 5 caan pek cu a za tuk”.

Malaysia nih Kawlrammi 28 telhin ramdangmi 94 a tlaih hna

“2020 kum thar aa thok bak in an ram ah a kir duh lo i phungninglo in a um rihmi le rian petu boss cu upadi ningin fak taktak in theipar kan zunter hna lai”.

“Penninsular Malaysia silole West Malaysia ah a ummi Lahwahkah zung rianttuan 200 hrawng cu hi programme thar thok dingin hin ready an si cang”.

“Phungninglo ramdangmi cu an rianngeitu boss te nih lahkhah an pek hna lo silole an ram tlunnak tangka an ngeih lo zongah Malaysia cozah nih a zaangfah in a bawm hna lai lo,” tiah Muhyiddin Yassin nih a chimchap.

A hlan deuh ah tuahmi phungninglo minung an ram kuatnak ‘3+1 amnesty programme’ cu kum 2014 August in ni kum tiang kha an on i RM400 million dantatmi he phungninglo minung 840,000 an kuat khawh hna. _ The Star Online

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.