Malaysia pa nih a thumi anu ruak thla 4 chung inn chungah aa umpi

Malaysia pa nih a thumi anu ruak thla 4 chung inn chungah aa umpi

Johor state, Tangkak khua ah a ummi Malaysia Tuluk pa nih inn chungah anu ruak thla 4 chung aa umpi, May 10 ah palek nih an hmuh.

Anu cu kum 85 a si. January thla ah lungfim loin a um i a nunnak liammi si, tiah Tuluk holh Mandarin in chuahmi Malaysia media China Press nih a ttial.

Malaysia pa cu kum 40 asi. Liamcia kum tampi lio ah accident in apa a thih caah anu he lawng a ummi si.

Anu cu a tthut tawnnak tthutdan cungah a tthut buin a thi. Aruak cu cutin a chiah beh.

Rawl a ei caan zongah a nammi anu ruak pawngah a tthu i a ei tawn, thla 4 chung.

Anu ruak a thut cangka in, lengah a rim chuak lai i thopaw an ra sual lai tiah innka le thlalangawng a khar dih.

Innpa pakhat nih inn chung in a thu tukmi rim a rat peng cu a hngalh peng ko nain, a fapa nih pung in a aihre mi haang a thlet tawnmi a hmuh caah anu zun le ek si ko lai, tiah a ruah peng.

April thla ah, a tunu nih ‘ka pi len ka duh’ a ti nain a fapa kum 40 nih a rak sian lo.

Kum 40 pa nih a sianh lo buin, May 10 ahkhan a tunu cu a pi leng dingin a kal. Aruak a thut dih cang cu a hmuh, i a rannak in palek sinah thawng a thanh.

Ruak cu Tangkak Hospital ah check dingin an kuat. “Lunghrinhmi hmapel zeihmanh a um lo” tiah sibawi nih an chim.

May 11 ah a fapa nih, “palek nih an ka tlaih lai ti ka phan caah ka nu a thihmi kong palek sinah thawng ka thanh lonak si,” tiah a phuan.

“Ka nu a thih in ni 1 hnu, a phin dih hnu lawngah a thih ka hngalh,” a ti. — World of Buzz, China Press, Says, Guang Ming

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.