Malaysia nih Kawlrammi 9 telhin ramdangmi 68 a tlaih hna

Malaysia nih Kawlrammi 9 telhin ramdangmi 68 a tlaih hna

Nizaan (Sunday) ahkhan Malaysia lahwahkah nih Negeri Sembilan state, Nilai khua i dawr chungah tlaihkhihnak a tuah i Kawlrammi 9 telhin ramdangmi 68 a tlaih hna.

Malaysia lahwahkah bawizik Datuk Khairul Dzaimee Daud nih a telpi hna.

“Thilpuan zuarnak dawr ah ramdangmi rianttuan an tam timi le ramdangmi nih dawr an tuah ti kan theih caah tlaihkhihnak kan tuah.”

“Zarhpini zinglei sml 11 in tlaihkhihnak kan thok. Dawr 39 ah ramdangmi 298 an check hna. Cu chungah minung 68 cu phungninglo in a ummi an si hna.”

“Kan tlaihmi pawl cu Pakistan rammi 51, Myanmar 9, Cambodia 1 le Bangladesh rammi 7 an si. Tlaihmi chungah nu zong an i tel i kum 20 in kum 40 kar an si. Hika hmun ah rianttuanmi ramdangmi tam deuh cu passport ttha tein an i tlaih hna,” tiah Malaysia lahwahka bawizik Khairul nih tuni ah a chim.

“Cambodia nu cu Malaysia ram tlawng dingin a rami a si nain dawr hngah rian a ttuan. Cucaah lahwahkah upadi a buar i kan tlaih.”

“Tlaihkhihnak kan tuah lio ah ramdangmi pawl cu an zaam len nain Road Transport Department nih motor 2 in a tlaih hna. Negeri Sembilan state lahwahkah nih tu kum thok in atu tiang an state chung hmun 58 ah tlaihkhihnak a tuah cang i phungninglo ramdangmi 114 a tlaih cang hna,” tiah Khairul nih a chimchap.

Nizaan tlaihkhihnak an tuah ahhin lahwahkah rianttuan, hmetpungtin sernak zung rianttuan, Lam zung rianttuan, SSM le palek tiin minung 292 an i tel.

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.