Malaysia Nih Kawlrammi 13 Telhin Ramdangmi 62 A Tlaih Hna

Kuala Lumpur hmun 6 ah palek nih phungninglo ramdangmi 62 an tlaihmi hna lakah Kawlrammi 13 an i tel ve. Kan hnu zarh Nithumni in Ningani tiang tlaihkhihnak an tuah lio ah an tlaih hna hi si.

Kuala Lumpur palek le Lahwahkah rianttuan 177 nih tlaihkhihnak cu an tuah.

Kuala Lumpur palek bawi Mazlan Lazim nih, “ramdangmi 136 kan check hna hnu ah phungninglo in a ummi 62 kan tlaih hna,” tiah a chim.

“Kan tlaihmi hna cu; Myanmar rammi nu 1 le pa 12, Somali pa 6, Zambian nu 4, Uganda nu 2, Kenya rammi 1, Bangladesh 14, India pa 9, Thailand nu 5, Pakistan pa 4, Nepal 1, Vietnam le Laos 1 veve an si,” tiah a chim.

“Phungninglo in Malaysia ah a lutmi an si hna caah Kum 1959/63 Lahwahkah Upadi Dal 6 (1) (c) in case kan tuahpiak hna lio a si.

“Kan tlaihmi vialte hna cu an tazacuai dingin Dang Wangi le Cheras palek sakhan ah kan hren hna.

“Kan ram chungah phungninglo ramdangmi tamtuk an luhmi, ahlei in thil ttha lo tuah a hmang tukmi African pawl tam tuk an luhmi hrim hi palek kan lungrethei tuk.

“Kan ram chungah sualnak a tlawm deuhnak he phungninglo ramdangmi an zor deuhnak hnga atu bantukin tlaihkhihnak kan tuah peng lai.

“Lunghrinhmi ramdangmi nan hmuh hna paoh ahcun Kuala Lumpur palek sakhan phone number 03-2146 9999 ah kan chawn ulaw tlaihkhihnak kan tuah colh lai,” tiah a chimchap.