14.9 C
Hakha
Monday, June 1, 2020

Malaysia: Myanmar ralzaam nih palek sin ah tah buin bawmh an hal

- Advertisement -

Kedah state ah ummi Myanmar ralzaam cheukhat nih tu thla thok ka ahkhan Alor Setar palek sakhan ah bawmh an va hal hna.

Alor Setar ahhin Kachin, Karen, Shan, Rakhine, Mizo (Chin), tbk., pawl an um. Laimi le Zomi cu an um tuk lo.

PKJI NGO biachimtu Tengu Emma Zuriana nih, “liamcia caan ahcun, ralzaam nih tlaih ṭih ruangah palek an hrial peng hna nain atu cu an vansang cang. Palek sakhan ah an ṭah buin rawl kan ei lonak ni tlawmpal asi cang tiin an chimh hna,” tiah a chim.

Malaysia cozah nih lengchuah a phih cangka in, Malaysia misi kho deuh pawl nih rianrang in supermarket ah rawl torlecheng an cawk i an i khon lio ah, midang cu ṭuan chom ei chom an si i khonmi an ngeih lo caah zarh tampi ca rawl an i cawk kho lo.

Lengchuah phihmi ruangah harnak a tong bikmi pawl cu ani ca in rian a ṭuanmi ralzaam le ramdangmi pawl hi an si.

Ralzaam le ramdangmi tampi cu tangka an ngeih ti lo caah thaizing ei awk khuazei in dah a rat lai ti thinphang in an um.

Malaysia ah phungninglo in a ummi ṭuan chom ei chom Myanmar rammi Poon, kum 25 cu dokcat in rian a rak ṭuanmi si i atu cun a innpa dawtnak thawng in a nung.

Inn khan 2 um apartment man fawi ah a nupi le kum 5 tang an fale 3 he khua an sa.

“Caan tam deuh cu buh lawng kan ei, a caan cun tisa ciah in ei khawhmi khohsuai lawng kan ei. Malaysia rammi he dokcat in rian kan rak ṭuanṭi. Atu cu kan dihlak in rian kan ngei ti hna lo i tangka kan ngei ti hna lo,” ati.

An umnak apartment ti man an pek khawh lo ruangah ti zong an phih hna. An innpa sinah ti an than.

Poon lawng mah dirhmun a tongmi si lo, adang zong mah bantuk dirhmun a phanmi an tampi.

Covid-19 pulrai a um an hngalh ko nain hmaihuh/mask an i cawk kho lo, ti an phih hna ruangah voi tlawm deuh lawng an i kholh cang, an zawt zongah sibawi sin piahnak tangka an ngei lo.

Charhchan: The Star

- Advertisement -

Ṭial Tharmi

Ramdang khrihfa nih ACR sin in Chin ralzaam tampi an bawmh hna

Dawtnak ngei ramdang khrihfa pawl nih Malaysia um Chin ralzaam tampi caah ACR (Alliance for Chin Refugees) sinah bawmhnak an pek, tiah...