Malaysia media The Star nih Chin Refugee video in Asian Media Laksawng a hmuh

  • The Star ttengnge R.AGE nih “Refugee No More” timi Chin refugee video in Asian Media Awards a ngah
  • Chin ralzaam bu le NGO cungah lawmhnak bia a chim

Kuala Lumpur — Chin ralzaam hna tuarnak kong “Refugee No More” tiin video a chuahtu The Star media ttengnge R.AGE phu nih Asian Media Awards laksawng a hmuh.

Zahan kha Singapore Flyer ah “World Association of Newspapers and News Publishers (Wan-Ifra)” tonnak an tuah i Asia ramtthen chung media nganbik pawl an chuak hna.

Mah lio ah R.AGE cu “Best Featuring Award” timi tlangtar in gold le silver laksawng 3 bak an pek. Chin ralzaam kong “Refugee No More” le Malaysia ah ramdangmi pawl sianginn kai dingin an hlenrawimi hna kong “Student/Trafficked project” timi video an chuahmi ruangah laksawng 3 bak an pek hna hi si.

Refugee No More

UNHCR nih 2018 June 13 ah Chin ralzaam hlawt dingin thawng a rak thanh ruangah Malaysia Chin ralzaam vialte lungrawk taktak in an rak um. Cheukhat cu hmailei kong lungdongh in amah tein aa thatmi tiang an um.

Chin ralzaam hna tuarnak kong cu The Star media thawngla chungin thil sining muru tiang a hlattu thawngla phu (investigative journalism team) R.AGE nih sau lakte an hlat hnu ah “Refugee No More” timi tlangtar in video he ca he kum 1 chung dengmang pehzulh in an chuah.

Chin ralzaam tampi nih an lungdonghnak kong an chim lio video pawl zong “The Chin Up Project” ti tlangtar in an tar i UNHCR, Malaysia le Myanmar cozah nawlnak an tuahpiak hna.

2019 March 14 ah UNHCR nih “2020 ah Chin Ralzaam Hlawt viar ding” timi policy cu a leet. Pehzulh tein ka zohkhenh peng ko hna lai, tiah thawng a thanh.

R.AGE nih “mah laksawng pawl hi Malaysia um Chin ralzaam bu, NGO le dawtu pumpak cio hna nih the Chin Up Project tuah a kan bawmhnak thawngin kan ngahmi an si.

“Anmah teirialnak thawngin, Chin ralzaam hlawt an si ti lai lo,” tiah an Facebook page ah lunglawmhnak an ttial.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. The Chin Express dirh a duh caah 2017 ah RSC ah rian dinhnak ca a ap i ni fatin Chin thawngpang le vawlei cung thawngpang phunkip a ṭial.