14.6 C
Hakha
Monday, June 1, 2020

Malaysia Khrihfabu nih Chin refugee tampi an bawmh hna

- Advertisement -

‘Every Nation Church Malaysia’ timi Malaysia rammi Tuluk khrihfabu nih Puchong um Chin chungkhar 100 cu rawl tlawmpal cio a bawmh hna.

Coronavirus zawtnak karh hlah seh tiin Malaysia cozah nih March 18 in April 14 tiang lengchuah a phih caah hohmanh rianṭuan khawh asi lo i Chin refugee pawl rawl ei awk an har tuk lai tiin a bawmh hna hi si.

Rawn Chin Learning Center Saya David Van Za Thawng nih, “gym ka kal tawnnak a ngeitu Tuluk pa nih phone aa ka chawnh i Puchong um Chin refugee min cazin rak ka kua aa ka ti,” tiah The Chin Express ah a chim.

“Keimah nih cun Puchong um Chinmi ka hngalh dih hna lo caah CCF Puchong Chairman Pu Than Tiam Ramlawt ka chawnh i meeting kan tuah hnu ah sangkip upa nih khrihfabu thleidan loin Laimi harsa min cazin lak a kan bawmh i Ningani ah ka kuat.

“A khrihfabu ‘Every Nation Church Malaysia’ ah bawmh kan herhnak kong a va chim i a khrihfabu nih a kan bawmh hi si.

“A kan bawmhmi hna cu;

  1. Puteri 7 sang um Chin chungkhar 47
  2. Tesco um chungkhar 29
  3. OTK um chungkhar 10
  4. Batu 14 um chungkhar 10 le
  5. Kinrara um chungkhar 4 an si. Single tlawmpalte an i tel ve nain 94% cu chungkhar lawngte an si caah a tawifiannak in ‘chungkhar’ ti khawh asi. Sang 5 ahhin Chin chungkhar 200 hrawng kan um, kan tamtuk i bawmh khawh dih ding kan si lo caah a harsa deuhmi chungkhar 100 min cazin lawng kan ap.
Saya David Van Za Thawng nih Every Nation Church Malaysia sinah Puteri 7 sang bawmh herh Chinmi cazin a pekmi – bawmhnak a la cangmi le la rih lomi theihnak ah a la cangmi paoh nih min thut asi.

“Cazin kan pekmi ning tein a kan bawmh dih. Bawmhmi caah cun a tlawm ko lai nain, minung kan tam caah bawmtu cu an dih ngai ko lai,” tiah a chim.

Bawmhnak an pek hna lai ah Chin Refugee Committee (CRC) zong thawng an thanh ta hna. Saya David Van Za Thawng nih min cazin a kuatmi hna cu an rung i put i bawmhnak cu an phawt cio hna.

Tesco sang chungkhar 1 nih an tinmi – hmanthlak: Ral Lian Kap

Facang 5kg, arti, cite, meggie (khohsuai), changreu, can food, tbk., pawl an bawmh hna.

Tuluk boss pa nih Chin chungkhar 6 a bawmh hna

Puteri 7 sang um Cinkhua mi Pu Dar Peng nih, “CSO ah a rak kai balmi kan naupa a boss Tuluk pa nih kan sang um Chin chungkhar 6 cu 5kg facang, arti, arsa, an hringso, tbk., a kan bawmh cio. Uak ngai cio a kan bawmh,” tiah a chim.

“Cun, OTK sangah ummi Laimi chungkhar pakhat cu an inn boss pa nih, tu thla cu zawtnak ruangah rian zong nan ṭuan kho lo i inn man ka pe hlah uh, kan dawt hna ati hna. Malaysia rammi Tuluk pawl hi an ṭha ngai,” ati.

Hriphi khuami zong an bawmh hna

Jalan Ipoh um Hriphi Chairman Pu Bawi Bik Thawng nih, “kan sianginn ah hlawh ngah lo zaanghleicawi in kan fale ca a chimtu Malaysia rammi Tuluk khrihfa le Mirang pawl i bawm in facang, arti, mehmuai, tbk., pawl a kan bawmh,” tiah a chim.

“Kan khuami a kan bawmhmi hi chungkhar le single fonh 52 (milu 200 hrawng) kan si. Tangka RM100 cio zong a kan pek chih,” ati.

FRO sin zongah bawmhnak an pek

“Damiel & Marriane’s Ministry” timi Malaysia Tuluk Khrihfa nih Falam Refugee Organization (FRO) sinah facang, chiti, pe, milk powder, le adangdang rawl bawmhnak tam nawn an pek.

FRO nih, “Laimi harsa chungkhar 110 sinah bawmhnak cu kan phawt hna,” tiah nizaan tihni ah a thanh.

Chin Refugee Committee (CRC) sin zongah Malaysia Kawlrammi chiat ni zohkhenhtu bu Kepong Free Funeral Services [annih hi cu Kawlrammi Buddhist an si, biaknak thleidan loin Kawlrammi paoh a bawmtu an si] nih Chinmi caah facang ṭhoh tam nawn a pek i Loke Yew, Pudu le Imbi um Laimi harsa deuh pawl an pek hna.

Alliance of Chin Refugee (ACR) sin zongah Malaysia Khrihfabu (Tuluk miphun) pawl nih Chin refugee caah rawl bawmhnak an pek len.

Zomi Association of Malaysia (ZAM) sin zongah Tuluk Khrihfabu dang pawl nih Chin ralzaam caah rawl bawmhnak an pek len ve.

Malaysia khua dang le sang dang um Chinmi pawl zong an pawngkam le anmah he aa naihniammi Malaysia Tuluk khrihfa pawl nih an ti khawh tawk cio in rawl an bawmh ve hna.

Mah pawl hi UNHCR nih a bawmhmi hna si lo. UNHCR sin in zei bawmhnak hmanh an ngah rih lo.

Chin Christian Fellowship (CCF) zong nih a member chungin a harsa deuhmi pawl bawmhnak caah bu tangka RM20,000 a hman ve. Adang Chin khrihfabu pawl cu an member an bawmh hna ti kan thei rih lo. Ramdang khrihfabu nih bawmh lawng an duh rua, an member an daw rua hna lo.

Rawl bawmhnak a ngahmi pawl caah cun lawlawse rawl ei awk cu lungrethei asi tuk ti lo, lengchuah phihmi an sauh ahcun phun dang si hnga. Nain, inn man le ti, mei man pek awk tangka an har ngai hna.

Nan inn boss te kha phone chawn hna ulaw April thla cu inn man dawt dingin nawl hna uh. Malaysia rammi, ahlei in Tuluk pawl nih cun thil sining an theihthiam tuk i an dawt pah len ko hna.

- Advertisement -

Ṭial Tharmi

Ramdang khrihfa nih ACR sin in Chin ralzaam tampi an bawmh hna

Dawtnak ngei ramdang khrihfa pawl nih Malaysia um Chin ralzaam tampi caah ACR (Alliance for Chin Refugees) sinah bawmhnak an pek, tiah...