Malaysia Chinmi pawl kirter dingin IOM le Chin state chawlet pawl an i tong

Ramdang phan Chinmi hna Chin state ah an kir khawhnak hnga IOM (International Organization for Migration) le Chin state rian ngei mirum pawl cu July 7 ah meeting an tuah.

Chin state chawlet pawl hruaitu Pu Kap Khan Pau nih, “ramdang phan Chinmi hna nih zeitin dah Chin state ah kir an duh khawh lai timi kong kan ceih,” tiah a chim.

“Hiti ning cun an kir duh lai lo cu awh. Mah ruang cun kahin an pawcawmnak rian serpiak an hau. Cucaah kahin a hlawhtlingmi rian ser a hau.

“Tahchunnak; thlanglei Laitlang ahcun tawlreba le chaklei Laitlang ah coffee hi zuar dingin ready asi tiang kan tuah khawhnak hnga i zuam hmasa hau.

“Atu cu avoi 1nk kan i ton lawng si rih i hnu zong ah a dikthlir in kan i ceih tthan te hna lai,” tiah a chim. — Zalen

Malaysia le India ummi nih cun kan theih cio bangin, IOM cu UNHCR he i bawm in refugee pawl ramthumnak kal a bawmtu le chuahkehnak ram kir a bawmtu bu asi.

Malaysia um Chinmi pawl ‘tlun nan duh ahcun UNHCR (IOM) sinah min rak pe ulaw kan in bawmh hna lai’ tiah liamcia kum 3 lio in atutiang a kan leem peng.

Nain, Malaysia um Chinmi nih min an pek duh lo hnu ah atu bantukin Chin state ah an va tlung i Chin mirum pawl an vai i ttuai hna.

IOM nih “Chin state ah kir khawh si cang…” ati ahcun Malaysia le India um Chinmi hna caah ram thumnak kutka aa khar colh lai.

Laitlang um Chin upa pawl nih zei thei loin Malaysia le India um Chinmi hna caah fahnak petu ding thil an tuah lo a biapi ngai.

Chin state, Paletwa peng chung i ralzaam 5,000 hrawng hmanh pawmcawnnak rian an pek khawh hna lo le Chin state chung i khi vialte minung pawcawmnak rian an pek khawh hna lo ahcun Malaysia le India um Chinmi 50,000 (Laitlang ah inn le vawlei zong a ngei ti lomi) kirter nak kong hi duhpaoh in an ttuan awk si lo.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. The Chin Express dirh a duh caah 2017 ah RSC ah rian dinhnak ca a ap i ni fatin Chin thawngpang le vawlei cung thawngpang phunkip a ṭial.