12.5 C
Hakha
Friday, April 10, 2020
More
    Ramkip
    1,511,104
    Zawtnak hmuhmi dihlak
    Ramkip
    328,661
    A dammi dihlak
    Ramkip
    88,338
    A thimi dihlak

    Malaysia Chinmi an i pumhnak DUMC member 3 coronavirus zawtnak an ngei

    Ṭial Tharmi

    - Advertisement -

    Petaling Jaya — Malaysia Chin mino tampi an i pumh tawnnak “Damansara Utama Methodist Church (DUMC) member 3 cu coronavirus zawtnak an ngei,” tiah Malaysia media The Star nih a thanh.

    A ngeimi 3 hna cu; Datin Doris Ho (Pastor Datuk Dr Daniel Ho nupi) le Bible study group ah aa telmi minung 2 an si.

    Bible study group ah aa telmi midang pawl cu Bangsar, Kuala Lumpur le hmun dangdang ah ummi an si hna.

    DUMC khirhfabu nih member pawl cu “coronavirus zawtnak ngei Bible study group ah aa telmi vialte cu midang kan chawnh hna nakhnga lo inn chungah kan um, i piah dingin kan i timh cio lio si,” tiin ca a kuat hna.

    “Ngandamnak Vuanci Zung (cozah) he i bawm in mah Bible study group ah aa telmi vialte le anmah he aa chawnbia mi vialte kan kawl cuahmah hna lio asi,” ati.

    DUMC cu Malaysia ram chung khrihfa biakinn lakah a nganbik ah aa tel vemi si. Ramchung state le khua tampi ah biakinn an ngei.

    Pastor Daniel Ho nih, “nizaan ah kan i check. Ka nupi cu coronavirus zawtnak a ngei. Kei cu ka ngei lo. Kan khrihfabu member 2 zong an ngei,” tiah a chim.

    Petaling Jaya i Section 13 ah ummi DUMC biakinn ahhin zarh fatin minung 5,000 hrawng peng an i pum. Cell group ti zongin auhmi Bible study group 300 hrawng an ngei.

    Mirang holh in an i pumh pinah, holh dang phun 5; Myanmar (Kawl holh), Chinese, Malay holh, Tamil le Nepal holh zongin an i pum.

    Coronavirus zawtnak a ngeimi 3 hi Mirang holh in aa pummi an si. Mirang holh in aa pummi hi minung 3,000 hrawng an si.

    Myanmar/Kawl holh in aa pummi chungah coronavirus zawtnak ngei an um/lo cu hngalh asi rih lo. Nain, an biakinn chungah coronavirus zawtnak ngeimi nih an tonghmi, an khuh/hathio hnawhmi, tbk., ah zawtnak virus a taang kho.

    Kawl holh in an i pumh caan ahhin Malaysia Chinmi tam taktak an i pum ve. Chinmi ahcun thlanglei Laitlang mi hi aa pummi an tambik. Laimi (Hakha, Thantlang, Falam, tbk.,) zong an tam pah ve.

    DUMC cu an i pumh a tam taktak. Zaanṭim 12am – 3am tiang hna an i pum. KL, Cheras, Sentul, tbk., hmun kip um Lai nungak tlangval pawl zong rianṭuan ṭin hnu 12am pumh ah an vai i pum tawn ve i deilei 3:30am hrawngah inn an phan tawn.

    An pumh a tamtuk i thawhlawm a tamtuk pinah, thawngṭha chim pawl nih ahlei hluat tukin pekchanhnak kong an cawnpiak hna caah Laitlang chungkhar tangka a kua pengmi kan hawile Lai mino cheukhat cu DUMC ah voi tam nawn an i pumh hnu cun an chungkhar tangka an kua kho ti hna lo, pekchanh aa biatak lomi zong cu an um ve ṭhiam ko, tiah DUMC ah aa pum balmi Laimi cheukhat sin in kan theih.

    Nawlnak: Kan website chung ca hi website dangah copy piak lo dingin kan in nawl hna.
    Tial Lian Thang
    Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.