Malaysia: Chinmi 3 thihnak kong he pehtlai in minung 2 an tlaih hna

Malaysia ah Chinmi 3 mawttaw accident in an thi

May 19 zingka 7am ah mawttaw accident in Chinmi 3 an thihmi kong he pehtlai in Malaysia palek nih Myanmar rammi 1 le Malaysia rammi 1 an tlaih hna.

Mawtaw ngeitu Malaysia rammi India pa M. Vasudavan, kum 56 cu Kampar khua i a inn ah May 20 zaanlei 4:30pm ah palek nih an tlaih.

Myanmar rammi Chin pa Law Kee Thang, kum 20 hrawng cu Kampar khua i a umnak inn ah May 20 zaanlei 5:45pm ah an tlaih ve.

Palek sakhan ah an hren hna i June 17 ah tazacuai an si te lai. Phungninglo Minung Luhpi Upadi le Lam Upadi in case an tuahpiak hna lio a si.

“Myanmar rammi 14 a phortu mawttaw cu Nissan Xtrail a si. Myanmar rammi cu mawttaw cawknak nawl an ngeih lo caah Ah Hong nih Vasudavan cu RM300 a pek i amah min in mawttaw cu ai cawk,” tiah palek nih an chim.

Mawttaw cu Myanmar rammi Ah Hong nih ai mongh. Ah Hong le Vasaduvan hi aa theimi an si lo caah Law Kee Thang nih a pehtlaih ter hna.

Tang lam in a rami Chinmi 14 a phortu mawttaw cu May 19 zingka 7am ah lamtthennak tung ai pah i minung 3 an thi, 7 fak tukin an i khawng i sizung 2 ah palek nih an kuat hna. A hma fa tuk lomi 4 cu palek nih an tlaih hna. [a thimi 3 cu Paletwa ralzaam an si, ka hmet law a thimi kong relchap]

“Kan tlaihmi 4 nih, Thailand ramri ah zaan 2 kan riah hnu ah kan dihlak in mawttaw pakhat chungah a kan ben, tlawmpal a kan kalpi hnu ah atu i accident kan tonnak mawttaw ahhin a kan tthial an ti,” tiah palek nih an chim.

Chinmi 14 a mongtu cu Ah Hong le a hawipa an si. Malaysia ah a ummi Chinmi an si. Mawttaw accident an ton lio ah an zaam i atutiang palek nih an hmu rih hna lo.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. The Chin Express dirh a duh caah 2017 ah RSC ah rian dinhnak ca a ap i ni fatin Chin thawngpang le vawlei cung thawngpang phunkip a ṭial.