14.8 C
Hakha
Monday, November 29, 2021

Malaysia Chinmi 10 ‘Lengchuah Phihmi’ zulh lo ruangah an tlaih hna

Lengchuah ruangah Chinmi 10 an tlaih cang hna, tiah Chin Refugee Committee (CRC) rianṭuan Saya Pakulh sin in kan theih.

“Malaysia cozah nih covid-19 zawtnak karh hlah seh tiin March 18 in April 14 tiang lengchuah a phihmi an zulh lo ruangah tlaih an ton hi si.

“Laimi (Hakha/Thantlang) 3 le Tedim an si. An dihlak in pa lawngte an si. 9 cu UNHCR card le catlap ṭha tein an ngei, 1 lawng hi community card aa tlaihmi si.

“Palek ka chawnh hna nain an thlah duh hna lo. Cozah nawl chuahmi an zulh lo ruangah tlaihmi an si caah voi dang he case aa dang ngai. An thlah te hna lai maw ti zong atutiang cu hngalh asi rih lo.

“Malaysia Chinmi nih cozah lengchuah phihmi hi ṭha tein kan zulh a herh. Biatak tein mipi sinah ralrin peknak zong thawngthanh a herh,” tiah a chim.

Laimi 3 cu kan hlat tikah Puchong Puteri 7 sang ah a ummi;

  • Saikah khua pa (single) – UNHCR catlap ngeimi
  • Ruabuk khua pa (nupi ngei) – UNHCR card ngeimi le
  • Hmaikhah khua pa (single) – UNHCR catlap ngeimi an si. An 3 in kum 30 tang an si hna. Nizaan tihni ahkhan inn pawngte ah a ummi ‘eidin dawr 99’ pawngah ṭhu in zuu an din lio ah an tlaih hna.

An min le hmanthlak cu kan langhter lai lo, anmah kong kan ṭial hnawhchanmi si loin Malaysia Chinmi nih cozah nawl ngaih a herh tuk ning kha kan ṭial duhmi asi.

Tedim pawl zong cu inn pawngah chinlung an chuih ruangah an tlaihmi hna an si.

Hmanthlak: Lengah hitin an thut ruangah palek nih an tlaih hna. Malaysia rammi 5 le India rammi 1 an tlaih hna lio si – March 27

Lengchuah phihka ahkhan Pandan Indah sang um Laimi zong chinlung an chuih lio ah palek nih an dawi hna i warning an pek hna. Lengchuah phihka ahcun palek nih mipi an tlai hna lo, warning lawng an pek hna. Nain, ni tlawmpal hnu cun chimh ngai lomi paoh an tlaih thluahmah hna.

March 26 ahkhan Subang ah Kawlrammi 2 an tlaih ve hna. Palek nih mawtaw lam an kham i an tlaih hna.

March 29 ahkhan Penang state i Butterworth khua ah Kawlrammi 3 hmun khat ah an um ruangah an tlaih hna.

Tuni, March 31 tiangah Malaysia rampumpi ah minung 700 leng an tlaih cang hna. Tam deuh cu Malaysia rammi an si. Inn chung um celh lo ruangah inn pawngah a tli (exercise tuah) mi, bawlung chuihmi, meeting tuahmi, a vakmi, tbk., pawl an si.

Taman Sungei Besi sang um Laimi zong nizaan ah bawlung an beng len. Palek nih an hmu rih hna lo i an vanṭha ngai.

Laimi cu a thli tein a bu in phe kah zong kan hmang. Khua, khrihfabu, pengtlang, tkb., upa meeting tuah zong kan hmang. Palek nih a kan hmuh ahcun kanmah tein thong kan i thlak si ko.

April 14 tiang cu rawl le sii cawk, le sibawi sin i piah ruah lawngah inn tang ṭum khawh asi. Mah hmanh cu minung 2 zulh a ngah lo, chungkhar 1 in minung 1 lawng a ngah. Cun, hmaihuh (mask) nai hruk hrimhrim lai, mah lo cun palek nih an in khirh lai.

Malaysia Chinmi vialte kan himnak hnga, mah ca hi minung tampi sinah phakter cio usih.

Malaysia
2,623,816
Mizaw Hmuhmi
Updated on November 29, 2021 12:29 pm
Malaysia
2,527,052
A Dammi
Updated on November 29, 2021 12:29 pm
Malaysia
30,309
A Thimi
Updated on November 29, 2021 12:29 pm
Malaysia
66,455
Zaw Liomi
Updated on November 29, 2021 12:29 pm

Ṭial Tharmi