26.5 C
Hakha
Monday, June 1, 2020

Malaysia Chin refugee chungkhar 1,600 leng nih UNHCR sinah bawmhnak an sok

- Advertisement -

Malaysia um Chin refugee chungkhar 1,633 (milu 5,000 hrawng) nih UNHCR sinah bawmhnak an sok, nain atutiang an ngah rih lo.

Coronavirus zawtnak karh hlah seh tiin Malaysia cozah nih March 18 in April 14 tiang lengchuah a phih caah hohmanh rianṭuan khawh asi lo i Chinmi tampi cu rawl ei awk le inn man pek awk kongah lungrethei vansang in an um.

Mah ruangah, Independent Chin Communities (ICC) tiin auhmi Chin ralzaam bu 5;

  • Chin Refugee Committee (CRC)
  • Alliance of Chin Refugees (ACR)
  • Falam Refugee Organization (FRO)
  • Zomi Association of Malaysia (ZAM) le
  • Dai Community Malaysia nih Chinmi chungin a harsa bikmi min cazin an khawmh i chungkhar 1,633 (milu 5,000 hrawng) cu kan hnu zarh ah UNHCR sinah bawmh an halpiak hna.

CRC Coordinator Pu Dawt Ceu Bik nih, “UNHCR nih bawmtu (donor) kan kawlpiak hna lai a kan ti i a kawl cuahmah lio asi,” tiah The Chin Express ah a chim.

“A poinak cu Malaysia cozah nih NGO pawl zong a bubu pi in bawmhnak pek a sianh hna lo ruangah an caah a buaithlak deuh.

“Bawmh ding minung kan tamtuk caah bawmtu caah a har ngai fawn. Pengtlang upa nih CRC sinah bawmh hau min cazin an apmi hi chungkhar 789 (milu 2,000 leng) an si. Tam deuh cu nuhmei, pahmei, chungkhar pacan lawng rian a rak tuanmi, tbk., pawl an si.

“Nain, UNHCR nih Malaysia khrihfabu (Tuluk miphun) pawl phone number a kan pek cio i atu kha Methodist khrihfabu cu ka chawnh hna i kan tuaktan lai an ti. Duhsah in a sangsang in bawmhnak cu an hmu te ko lai.

“Cun, Malaysia Tuluk tlawmpal zong nih refugee pawl rawl bawmh kan duh hna tiin an ka chawnh i April 7 in 14 kar ah rawl bawmhnak tlawmpal a phan ding zong um.

“Rawl bawmhnak cu an hmu pah te ko lai, nain inn man pek awk tangka bawmhnak cu an hmu lai lo.

“Malaysia Kawlrammi chiat ni zohkhenhtu Kepong he i bawm in nai zongah facang le eidin cu Loke Yew, Pudu le Imbi um a harsa deuhmi pawl kan pek hna,” ati.

ACR Coordinator le Acting Chairman James Bawi Thang Bik nih, “ICC nih UNHCR sinah bawmh kan halpiakmi dihlak hi chungkhar 1,633 (milu 5,000 hrawng) an si,” tiah a chim.

“Atutiang cu bawmhnak an ngah rih lo. UNHCR nih NGO sinah bawmhnak a kan halpiak lio asi. Bawmhnak soktu tam deuh cu ani ca in rian a rak tuanmi, chungkhar minung tammi, tbk., pawl an si.

“A sangsang tete in bawmhnak cu an hmu te ko lai. Lungsau tein hngah a hau.

“Nain, rawl lawng asi lai. Inn man peknak tangka cu bawmh um lai lo.

“Atu zong hi UNHCR tolrelnak si loin Malaysia rammi le ACR a kan bawmtu ramdangmi nih direct in ACR sinah facang, chiti, milk, baby powder, mehmuai, tkb., a kan hlut pah len. Chin ralzaam chungkhar cheukhat cu kan phawt pah cang hna.

“A tlawmbik Chin chungkhar 500 leng cu an herhmi kan bawmh cang hna. Facang hi cu tam kan pe rih hna lo. Bawmhnak ra deuh rih seh tiin kan khon, nain facang ngei lomi cu kan pek ko hna,” tiah a chim.

FRO, ZAM le Dai sin zongah Malaysia rammi pawl nih Chin refugee caah rawl bawmhnak an pek pah len ve, nain Chin refugee dihlak caah aza cu si lo. Malaysia ah Chinmi 30,000 leng kan um.

Sang cheukhat um Chinmi cheukhat cu UNHCR tolrelnak si loin Malaysia rammi Tuluk khrihfa pawl nih anmah lungtho tein rawl an bawmh pah ve len hna – mah hi hmet law rel khawh si.

Chin Christian Fellowship (CCF) zong nih a member chungin a harsa deuhmi pawl bawmhnak caah RM20,000 a hman – mah hi hmet law rel khawh si.

- Advertisement -

Ṭial Tharmi

Ramdang khrihfa nih ACR sin in Chin ralzaam tampi an bawmh hna

Dawtnak ngei ramdang khrihfa pawl nih Malaysia um Chin ralzaam tampi caah ACR (Alliance for Chin Refugees) sinah bawmhnak an pek, tiah...