Malaysia ram ah tilawng in kal aa timmi Rohingya ralzaam 84 cu Bangladesh palik nih an kham manh hna tiah Nirukni ahkhan Bangladesh cozah nih thawng a thanh.

“Rohingya 67 cu Kutupalong ralzaam camp ummi an si,” tiah Pekua palik nih an chim. Kutupalong ralzaam camp cu vawlei cung ralzaam camp lakah a nganbikmi a si.

Rohingya ralzaam pawl cu ngatlaihnak tilawng cung kai an timh lio ah Bangladesh palik nih an tlaih hna hi a si.

Malaysia Ah Luh Aa Timmi Rohingya 115 Tlaih An Tong

Nu 31 le ngakchia 15 an i tel.

Bengal rili ah a ummi Saint Martin vawlei hmeite ah ramri cong/veng ralkap nih a dang Rohingya 17 le Bangladesh puaisa 5 cu ngatlaihnak lawng cung an kai hlan deuh ah an tlaih hna.

“Mi nih thawng a kan thanh caah kan rak tlaihmi hna an si,” tiah ramri veng ralkap bawi Fayezul Islam Mondol nih a chim.

Malaysia Palik Nih Rili Kam Rohingya 37 An Hmuh Hna

2017 ah Myanmar ralkap nih Rohingya an hrem hna ruangah Rohingya 740,000 hrawng cu Bangladesh ram ah an zaam.

Mah hlan ah Cox’s Bazar i ralzaam camp ahhin Rohingya 300,000 an rak um cang.

Rohingya ralzaam thong tampi cu nuntha deuh in nun an duh ruangah ralzaam camp in an zaam i Malaysia le Thailand ram ah luh an i tim hna. _ AFP