Thailand palek nih Nirukni ahkhan Malaysia ram ah phungninglo in luh aa timmi Kawlrammi 57 cu Sadao district ah an tlaih hna.

Kawlrammi pa 54 le nu 3 cu Malaysia ram ah lut dingin Thailand ram, Ban Mae Nam khuate ah a ummi khaihriat kung cinnak dum ah an i dor lio ah Thailand palek nih an tlaih hna hi a si.

Thailand palek nih thil sining an kherhlai tik ah Kawlrammi hna cu puaisa te nih group 2 in an tthen hna i khaihriat kung cinnak dum ah an dorter chung hna.

Group 1nak ahhin minung 20 an si i, khaihriat kung cinnak dum ahhin ni 3 an um cang. A dang group 1, minung 37 cu Ningani zaan ahkhan a phanmi an si.

Tlaihmi Kawlrammi 57 cu khaihrait kung cinnak dum ahhin midang nih rak lak i Malaysia ram ah luhpi dingin mi an hngahter mi hna a si.

July 3 ahkhan Hat Yai district ah atu tlaihmi Kawlrammi 57 an rak um chungnak inn a ngeitu pa (Kawlrammi) cu Thailand palek nih an tlaih.

Thailand cozah nih a luancia kum 4 in khan phungninglo minung luh/chuahnak cu biatak tein a doh. Tampi a tlaih khawh ve hna, tlaih khawh lomi zong an um len ve.

A luancia thla 6 in khan Malaysia nih a ram ah ngahtlaih le cintlaknak rianttuan dingin minung a herh caah atu bantuk in Malaysia ram ah kal an i timh hi a si tiah Thailand palek nih an chim. _ Bangkok Post