Malaysia ah accident in a thimi 3 cu Paletwa Chin ralzaam an si

Malaysia ah accident in Chinmi 3 thi, 7 sizung phan, 4 palek nih an tlaih hna

Kuala Lumpur — Chinmi 14 accident kong cu Malaysia um Chin Ralzaam Bu hruaitu hna nih tuni ah an hlat i atanglei hi atutiang thil sining kan theih khawh tawk asi.

Tang lam in Malaysia a ra Chinmi 14 mawttaw May 19 zingka 7am ah accident a ton ruangah a thimi 3 cu Chin state thlanglei Paletwa peng i AA le Kawl Ralkap i kah ruangah a zaammi an si.

“Chinmi 14 a phortu mawttaw cu a mongtu nih a control khawh lo caah Penang state le Kuala Lumpur territory kar (Ipoh le Butterworth khuapi kar) i highway hlei cung ah fak tukin lam tthennak tung aa pah,” tiah Malaysia Kawlrammi Ruakvuinak Bawmtu Bu chairman U San Win nih a chim.

Mawttaw cu aa baoh dih. Mawttaw mongtu hi minung 2 an si. An zaam i atutiang palek nih an tlai kho rih hna lo. Chinmi an si ve, tiah mawttaw ai citmi nih an chim.

Minung 4 cu highway hlei tangah an i hlonh i a hmun ah 3 an thi. Minung 7 cu an hma a fah tuk caah palek nih sizung 2; Parit Buntar Sizung le Taiping Sizung ah an kuat hna.

A hma fak tuk lomi minung 4;

  • Pau Khan Khual (Tedim)
  • Mang Lam Sing (Tonzang)
  • Mang Mun Tuang, kum 17 (Kalaymyo) le
  • Go Pum Thang, kum 25 (Zozang) hna cu palek nih an tlaih hna i bia an hal hna lio a si.

Chinmi 14 hna cu pa 13 le nu 1 an si. Minung 4 cu Chin state, Paletwa peng i Sami khua in a rami ralzaam an si i 3 an thi. 1 cu sizung ah kuatmi 7 lakah aa tel ve.

Adang pawl cu Matupi, Tedim le Tonzang peng in a rami an si hna.

“Paletwa pengin a rami Khumi Chin 4 an si. 3 an thi. 1 sizung ah an thlop lio a si,” tiah ACR in thongtla bawmtu Ai Lwin nih a chim.

Minung 4 hlei tangah an i hlonh i 3 an thi

A thimi 3 hna cu;

  • Maung Tan (apa – Pu Nay Pa),
  • Su Mon (apa – Pu Tun Tin) le
  • Khat Leih (apa – Pu Pyi Saung) hna an si

“Ruak vuinak kong he pehtlai in an chungkhar duhnak hal kan i zuam lio a si. An chungkhar pehtlai kan i zuam cuahmah lio asi i, zei tik ni dah kan vui te hna lai ti a fiang rih lo,” tiah Ai Lwin nih a chim.

Accident an tonnak hmun ah Kuala Lumpur um Myanmar Tanzung lutlai U Sein Oo le a kuttang pawl, Malaysa Kawlrammi Bawmtu Bu rianttuan pawl le Malaysia palek nih thil sining an zoh.

Mah kong hi UNHCR zung ah thawngthanh dingin Malaysia um Chin Ralzaam Bu pawl nih tling deuh in an hlat cuahmah lio a si. Thaizing zong Penang state ah Independent Chin Communities (ICC) nih an va hlat rih lai.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.