Louis Tomlinson Farnu Ruahlo Piin A Thi

Louis Tomlinson Farnu Ruahlo Piin A Thi

Mirang hlasa minthang One Direction band chungtel Louis Tomlinson farnu Félicité cu inn chung ah ruahlo piin a thi. A thih ahhin kum 18 lawng a si.

Félicité Tomlinson cu lungtor in a thih hi si lai tiah an ruah. Kum 2016 ahkhan hringtu an nu Johannah nih leukaemia zawtnak in a rak thih tak hna.

Félicité cu Nithumni i chuncaw ei caan ah West London i Earls Court inn dot 4nak ah ruahlo piin a tlu. A pawngah a ummi fashion designer le social media influencer simi pakhat nih 999 a chawnh.

A hmun ah ambulance 2 a phan. Nain, Félicité cu sibawi nih khamh manh lo in a nunnak liam.

Hi lio ahhin a ta The X Factor biakhiaktu (judge) Louis Tomlinson (kum 27)) cu London ah rian a ttuan lio si i Nithumni zaan ah palek nih a farnu thihnak kong cu thawng an thanh.

Louis Tomlinson hi atu a thimi a farnu he hin aa tlaihchan bikmi an si. London ah an leng tti pah lengmang tawn. Louis cu a ngaihchiat tuk lio si caah a rian tampi a ngol chung. _ The Sun