London biaceihzung ah Julian Assange an chuahpi

London biaceihzung ah Julian Assange an chuahpi

Julian Assange cu London khuapi um Westminster Biaceihzung ah an chuahpi cang [Julian Assange an tlaihnak kong na rel rih lo cun ka hmet law rel khawh si].

Biaceihtu nih “2012 i aamahkhan in kan in thlah kar ah Ecuador tanzung ah na zaam, upadi na buar” a ti. “Ka buar lo” tiah Julian Assange nih a leh nain tehte a piah duh lo.

Hnu ah “na buar” tiin biaceihtu nih bia a khiah.

May 2 ah biaceihzung ah an chuahpi tthan lai i “US cozah sinah kuat/lo kong” an ceih tthan lai.

Zei ruang dah US cozah nih ‘kan kua uh’ a ti?

2010 March thla ahkhan Julian Assange le US ralkap a rak ttuanmi nu Chelsea Manning nih US Ralkap Vuanci Zung computer an rak hack i US ralkap thlithup cazin thong tampi an fir.

An firmi thlithup cazin pawl cu Chelsea Manning nih Julian Assange sinah a kuat i Wikileaks website ah an phozar dih.

Chelsea Manning nih Julian Assange sinah a rak kuatmi thlithup cazin pawl cu;

  • Afghanistan ral cazin 90,000
  • Iraq ral cazin 400,000 le
  • US Ramleng Vuanci Zung cazin 250,000 bak an rak si.

US nih Afghanistan le Iraq ah ral an tuknak kong cazin le video files thong tampi an firmi lakah US ralkap nih Afghanistan le Iraq mi sawsawh an thah hna lio video zong aa tel, online ah mikip hmuh in an phozar.

Chelsea Manning cu US nih kum 35 thong dan an pek i kum 3 a tlak hnu 2017 January ah President Obama nih a ngaihthiam caah May 17 ah ralkap thongin in an thlah.

Nain, a rak tuahsermi sualnak kong cu biaceihzung nih “na tuahnak aruang kan chim?” tiin a hal tikah a chim duh hna lo.

Mah ruangah 2019 March thla ah thong an thlak tthan.

Julian Assange cu Chelsea Manning he US Ralkap Vuanci Zung computer an rack hack i thlithup cazin an fir i an phozar pinah, adang US cozah thlithup thil tampi zong a phozar.

2016 US President i cuh lio ah Hillary Clinton email thong tampi le Democratic National Committee (DNC) email thong tampi zong Wikileaks.org website in a rak phozar.

Nain, atutiang US cozah nih taza a cuaimi cu Ralkap Vuanci Zung computer hack le thlithup cazin fir kong lawng asi rih, hmailei ah adang case in taza a cuai chap lai maw ti cu hngalh asi rih lo.

Julian Assange cu Britain nih US ah a kuat cun kum sau taktak thongthlak a tong men lai tiah zumh asi.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. The Chin Express dirh a duh caah 2017 ah RSC ah rian dinhnak ca a ap i ni fatin Chin thawngpang le vawlei cung thawngpang phunkip a ṭial.