Lei cung mirum bik Amazon boss nih $36 billion in a nupi a tthen

Lei cung mirum bik Amazon boss nih $36 billion in a nupi a tthen
  • A nupi he January ah an i tthen hnu, tuni ah chawva an i tthen kho
  • A nupi cu $36 billion deng a tthenh i lei cung nu vialte lakah a rumbik 3nak ah ai chuah
  • Mah hnu zongah Amazon boss pa cu lei cung mirum bik a si tthiam rih

New York: Amazon company dirhtu Jeff Bezos le a nupi Mackenzie cu January thla ah an i tthen hnu in “chawva i tthenhnak kong” an ceih i tuni ah a nupi cu $36 billion a tthenh cang.

Jeff Bezos nih Amazon company share 4% ($35.6 billion) cu Mackenzie a pek. Vawlei hram thokka in nihin tiang a va he aa tthenmi nu vialte lakah tangka tambik a ngahtu a si.

Nain, Jeff Bezos hi a rum hnu ah a vatmi si lo. An i um hnu ah an nuva i bawm in hi zatzat tangka an ngeih hi si. Cucaah “a cheu veve in an i tthen te men lai” tiah upadi thiamsang pawl nih an rak ruahdamh len nain Jeff Bezos cu aa miak ngai lehlam.

Mackenzie Bezos nih, “Washington Post le Blue Origin i ka chawva vialte a ningte in ka pek dih pinah, Amazon share ngeitu dirhmun in vote thlaknak nawl ka ngeihmi zong ka pek chih dih,” tiah Twitter in thawng a thanh.

Amazon, Blue Origin le Washington Post (tadinca) hi a pathum ningin Jeff Bezos le a nupi hlun (a tthen cangmi) Mackenzie Bezos nih an ngeihmi company an si.

Jeff Bezos, kum 55 le a nupi hlun Mackenzie, kum 48 cu 1993 ah an rak i um i fa 4 an ngei. 1994 ah Jeff Bezos nih Seattle khuapi i an inn kudawng chungah Amazon company cu a rak dirh i nihin ahcun vawlei cung online dawr vialte lakah a nganbik le a rumbik asi.

Atu lio Amazon company share dihlak man hi $890 billion a si, tiah US Securities and Exchange Commission cazin nih a langhter. Mah chungah 4% ($35.6 billion) cu Mackenzie nih aa lak lai.

Jeff Bezos cu Amazon stock 12% ($110 billion) aa lak ve. Vawlei cung minung vialte lakah a rum bik a si tthiam rih. 2nak ah Microsoft company dirhtu Bill Gates le 3nk ah Berkshire Hathaway chairman Warren Buffett hna an si.

Amazon share dang ($744 billion) cu company dang le pumpak cio nih an ngeih.

Mackenzie cu a vapa Jeff Bezos he an i tthen i amah pumpak bak lawngin $35.6 billion a ngeih cang caah “atu hi vawlei cung nu vialte lakah a rumbik 3nak asi” tiah Forbes magazine nih a ttial. Nu a rumbik mi cu 1nak ah L’Oreal rocotu Francoise Bettencourt Meyers le 2nk ah Walmart rocotu Alice Walton hna an si. — Bloomberg Business, CNBC le BBC English

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.