Kum 1 chungah Chin state ah minung 100 leng HIV zawtnak chawnh an tong

Chin state ahhin kum 1 chungah minung 100 leng HIV zawtnak chawnh an tong. Tam deuh cu nupa sualnak tuah in chawnh an tong, tiah Chin state Mipi Ngandamnak Zung cazin nih a langhter.

“2018 January in December tiang Chin state pumpi (peng 9) ah nau pawi liomi nu, an vale le an fale, sizung phan mizaw le thi hlutu, an dihlak minung 3,615 cu thi kan check hna i minung 122 sinah HIV zawtnak hrik kan hmuh,” tiah Mipi Ngandamnak Zung lutlai bawmtu Dr. Sharon Par nih a chim.

2018 chung ah HIV zawtnak hrik ngei an hmuhmi hna cu atanglei bantukin si;

  • Tedim peng ah HIV zawtnak ngei 42 an um
  • Hakha peng = 22
  • Tonzang peng = 17
  • Mindat peng = 13
  • Falam peng = 12
  • Matupi peng = 7
  • Thantlang peng = 4
  • Kanpetlet peng = 2
  • Paletwa peng = 1

“HIV zawtnak chawnh a tongmi lakah upa lei ahcun nu an tam deuh. Kum 12 tang pa ngakchia pawl hi cu an nule nih an chawnhmi hna deuh si,” tiah Dr. Sharon Par nih a chim.

“HIV/AIDS dohnak sii ART cu Chin state ah Hakha, Falam, Tedim le Mindat khuapi hna ah ngah khawh an si. ART sii cu manlo tein kan pek cuahmah hna,” tiah Dr nu nih a chim.

Nupa Sualnak in Chawnh Khawhmi Zawtnak Dotu Zung (Chin state) cazin ningah, Hakha ahhin 2012 thokin HIV dohnak sii ART cu pek an thok i atu 2019 June thla tiangah minung 156 an pek cang hna.

Hakha General Hospital

Phun dangin chim ahcun, Hakha peng lawngah HIV zawtnak ngeimi minung 156 leng an um cang.

Mindat khuapi ah 2015 June thla thokin HIV dohnak sii ART cu an pek ve hna i 2019 June thla tiangah minung 44 an pek cang hna.

Falam khuapi ah 2018 January thokin an pek ve i 2019 June tiangah minung 38 an pek cang hna. Tedim ah 2018 January in pek an thok ve i minung 65 an pek ve cang hna.

Hakha, Mindat, Falam le Tedim peng lawngah HIV zawtnak a ngeimi minung 300 leng an um cang tinak asi.

Chin state he aa rimi Mizoram state cu India ram chungah HIV zawtnak a karh biknak state ah ai tel. — Khonumthung

Na Rel Cang Maw?

Ṭial Tharmi

VIDEO – Aung La Nsang nih Round 2 bakah Vera a...

Aung La Nsang nih Brandon Vera cu round 2 ah puai piat bakin a tei colh. Kehlei kuttum in a kha ah...