Malaysia lahwahkah nih tuahmi Phungninglo ramdangmi an ram kirternak ‘Back for Good” (B4G) programme cu August 1 in an thok i, minung 290 nih min an pek.

Nizaan ahkhan Myanmar rammi telhin phungninglo ramdangmi tampi cu an passport he Lahwahkah Zung ah an ra i lung sau tein an i tlang hna.

Cheukhat cu a herhmi catlap tling an i ken lo ruangah kirter an si.

“Phungninglo ramdangmi 290 nih tuni ah B4G programme ah min an pek,” tiah Kuala Lumpur Lahwahkah Zung director Hamidi Adam nih a chim.

“A phichuak tha ngai. Tuni lawngah ramdangmi 290 nih min an pek. A tambik cu Indonesia rammi an si. Pahnihnak ah Bangladesh le Myanmar rammi an si”.

“Anmah pawl cu Malaysia ram ah phungninglo in a rak lutmi le passport nithla thih hnu tiang a ummi an si hna. Mi hlen an tonnak hnga lo vanlawng ticekt niam tuk in an zuarmi cawk lo dingin ralrin kan pek hna. Minung pakhat ah RM700 cio an liam,” tiah Hamidi Adam nih a chimchap.

July 18 ahkhan Malaysia Ramchung Vuanci Tan Sri Muhyiddin Yassin nih “Malaysia ram chung ah phungninglo minung an zornak hnga B4G programme kan tuah i Aug 1 in Dec 31 tiang caan kan pek hna lai” tiah thawng a thanh.

“Lahwahkah nih Back For Good (B4G) programme in phungninglo ramdangmi 200,000 tlunter kan timh hna,” tiah Immigration Department director-general Datuk Khairul Dzaimee Daud nih a chim ve.

Hi programme cu Malaysia Lahwahkah lawnglawng nih a tawlrel lai, Agent silole a bawmtu tibantuk zeihmanh an um lai lo. Cun, mah programme cu Peninsular Malaysia/West Malaysia lawnglawngah tuah khawh a si lai.

Lahwahkah thong (camp) ah thlak liomi pawl cu B4G programme ah telh khawh an si lo.

Phungninglo minung pawl nih Lahwahkah zung an kal hlan ah anmah ram i tanzung cio ah passport/visa an lak hau lai. Cun an ram tlunnak vanlawng ticket an i cawkmi kha lahwahkah sin ah an piah hnu ah RM700 an liam lai.

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.