Atu hi Myanmar ram hmun cheukhat ahcun ni a lin taktak. Ni a linh tuk ruangah mah aa hngal lomi mi zaw 10 cu Bago sizungpi an phan i cu chung ah minung 4 an thi tiah Bago sizung uktu Dr. Yan Nai Maung nih a chim.

Ni a linh tuk ruangah takpum chunglei linh tuk (Heat Stroke) in mahhngal loin a ummi minung 10 cu April 20 in 26 kar ah Bago sizung an phan.

“A thimi minung 4 lak ah 3 hi cu sizung ah an thi. Pakhat hi cu a thih hnu ah sizung an ratpi mi a si. Heat Stroke ruangah an si hna. Sizung phanmi 10 lakah minung 2 cu an dam cang. A dang 4 cu sizung ah an um rih ko,” tiah sibawi pa nih a chim.

April 22 zong ah heat stroke raungah pa pakhat cu Yangon sizung ah aa thlop.

Yangon khua chung um sikhan cheukhat zong ah nilinh tuk ruangah a rak i piahmi hi ni khat ah minung 10 leng an um ti a si.

“A caan ahcun ni khat ah minung 20 dengmang sikhan ah an ra. A lungmit, an thaba, an tak lin tuk.”

“A tam deuh cu ngakchia le tar an si. Cun, nilin lak rianttuanmi zong an i tel,” tiah Hlaing Tharyar ah a ummi sikhan rianttuan pakhat nih a chim.

Nilin ruangah a chuakmi zawtnak tampi lak ah Heat Stroke hi minung nunnak caah tihnung mi a si.

April zarhhnihnak thok in khan Ngandamnak le Zaanglehnak Vuanci Zung nih nilin lakah mipi i kelven ning, sizung pawl ah nilin ruang i sizung phanmi mipi thlop ning pawl ralrin theihternak a tuah. _ 7Day Daily