Kawl Ralkap 6 nih Chin pa sizung phan lakin an velh

Kawl Ralkap 6 nih Chin pa sizung phan lakin an velh

Chin state — Matupi khua ah a ummi Myanmar Ralkap LIB 140 chungtel ralkap 6 nih ‘mei na kan hmihpiak’ tiin Mei Zung rianttuan pakhat cu April 20 ah an velh, tiah CHRO sin in kan theih.

Matupi khua Bungtla hydro-electric sehzung ah lutlai a simi Salai Boi Ha, kum 30 nih April 20 (Zarhteni) zaan ah ti tha a der caah LIB 140 battalion ralkap sakhan pekmi mei cu chikhat a hmihpiak hna.

Mah cu an thinhun caah ralkap 6 cu tlor thingpher pakhat cio i put in Salai Boi Ha cu an kal hnawh. “Zei ruang dah mei na kan hmihpiak!” an ti i an velh thluahmah, tiah CHRO nih a chim.

An velhnak ah Salai Boi Ha cu alu kuai i a kehlei kut zong an tuknak thingpher ah aa khenhmi thir nih thuk piin a sawh.

Salai Boi Ha a veltu hna cu LIB 140 battalion in Ralkap Bawi Kyaw Kyaw kuttang um ralkap pawl an si.

“An 6 ningin ralkap sahkhan thonginn ah kan thlak hna tiin Ralkap Bawi Kyaw Kyaw aiawh biachimtu nih a chim,” tiah Salai Boi Ha nih a chim.

Salai Boi Ha nih, “Fur le Khuasik caan ahcun ti a tam caah Phanai khua, Matupi khua Sanbaung sang, LIB 140 battalion, Military Tactics Battalion le LB 304 battalion pawl cu ni 1 dan in mei kan pek hna,” tiah a chim.

“Nain, Tthal caan ahlei in April le May thla ahcun ti a tlawm caah Phanai khua le Sanbaung sang cu voi 1 hmanh mei kan pe hna lo i Military Tactics, LIB 304 battalion le IB 140 battalion cu ni 1 ah suimilaam 1:30 chung cio kan pek peng hna.

“Kum dang zongah hitin kan pek tawnmi hna a si. Cucu mah ralkap pawl nih hin zeitin dek an ruah ka hngal ve lo.

“Thaizing May 4 ah kan i ton tikah aa ka veltu ralkap pawl kha an dihlak in rak chuahpi hna ka ti hna, mah tikah ka hal te hna lai,” tiah Salai Boi Ha nih CHRO sinah a chim.

Mah kong he pehtlai in CHRO Field Director Salai Terah nih, “hi bantuk in an velh phung si lo, hi cu fihnung tuahsernak a si. Limhang a ngeimi bu pakhat nih hi bantukin mi an velh awk si lo, electric zung rianttuan kha rian a fel lo ahcun phungphai ning tein a theipar zunter khawh a si ko. Hi bantuk in velh cu fihnung tuahsernak a si, limhang ngeih lonak zong a si. Hmailei zongah ralkap nih meithal i bochan in mipi le zung rianttuan an velh hna awk a si lo,” tiah a chim.

Ralkap nih tangka in ngaihthiam an hal hna nain Salai Boi Ha a chungle nih ‘Matu phung in catlap cung minsen thut he ngaihthiam na kan hal ahcun tangka in liamh khawh a si ko, cutin nan tuah khawh lo ahcun kan in report hna lai’ an ti hna i thaizing May 4 hi aa tong tthan ding an si. — CHRO le Khonumthung

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.