Nizaan ahkhan Japan ram, Kyoto khuapi ah a ummi Kyoto Animation company cu mei a kang i minung 33 an thi, a hliammi 36 an si cu chungah minung 10 cu atu hi mizaw zual zohkhenhnak khan ah an um.

Inn a kangmi hi dot 3 a si i kum 41 pa nih a duah hriamhriammi a si.

Mipa cu nizaan zinglei sml 10.30 (Japan caan) hrawngah Kyoto Animation headquarters a lut i datsii in a toih hnu ah mei a duah. Cun, thi dih uh tiah a au.

Atu tan thil an tonmi hi kum 2001 ah Tokyo khuapi ah mei kangh in minung 44 an rak thih hnu in a fak bikmi thihnak an ton a si.

Mei duahtu pa cu Nilini ahkhan petrol dawr ah a kal i datsi 20-litre thawl 2 a cawk. Inn a kanghnak hmun pawng ah palek nih bag 1, datsi thawl 2, trolley le namsau 5 an hmuh.

Kyoto animation studio a kang

Mei duahtu pa hi a min ah Shinji Aoba a si tiin palek nih an fehter cang. Kyoto Animation company ah rian a ttuanmi a si lo.

“Mipa cu palek nih an tlaih lio ahhin a thinhung tuk. Ka idea/thil/rian an fir/ an ka chuh tiin a au len,” tiah mit hmutu nu pakhat nih a chim.

“Kyoto Animation company cu office caah a hmanmi a si tik ah sprinklers silole indoor hydrants bunh a hau ah an ruah lo caah an bunh lomi a si,” tiah Kyoto khua meithat zung nih a ti.

KyoAni ti zong in mi tampi nih theihmi Kyoto Animation cu kum 1981 ah rak dirhmi a si i “K-On” le “The Melancholy of Haruhi Suzumiya” timi telhin animation show tampi a sertu company minthang a si.

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.