Japan ram, Kyoto khuapi ah a ummi Kyoto Animation company cu mei a kang i minung 13 an thi, aa hliammi zong tampi an um tiah nawl ngeitu nih an thanh.

“Tuni zingka ahkhan mipa pakhat nih Kyoto Animation studio a baoh i datsi a toih i mei a khangh,” tiah palek nih an chim.

Mei duahtu a si lai tiah lunghrinh mi pa cu palek nih an tlaih khawh cang. Aa hliammi pawl cu sizung ah an kalpi hna.

Tuni zinglei sml 10.30 (Japan caan) hrawngah dot 3 inn cu mei nih a kangh. Atu tiang meithat rianttuan nih mi an khamh cuahmah hna liopi a si rih.

“Inn dot 3 chung ah aa tap mi minung an tampi rih. Amah tein a chuak kho lomi zong an um len. Anmah pawl cu leng chuah pi dingin kan i zuam cuahmah,” tiah meithat rianttuan pakhat nih a chim.

“Datsi a toih i mei a khangh. A hmun ah namte zong an hmuh chih,” tiah Kyoto khua palek pakhat nih a chim.

Mei duahtu pa nih hin mei a duah pah in ‘thihnak ka thlak’ tiah a au pah. Mipa le company hi zeitin dah an i pehtlaih ti a fiang rih lo.

KyoAni ti zong in mi tampi nih theihmi Kyoto Animation cu kum 1981 ah rak dirhmi a si i “K-On” le “The Melancholy of Haruhi Suzumiya” timi telhin animation show tampi a sertu company minthang a si.

KyoAni fan pawl nih social media ah an lungthat lonak le an ngaihchiatnak an langhter len. _ CNA