Innpi Chin James nih Chin refugee tuanbia cauk 'National Library of Malaysia' ah a...

James nih Chin refugee tuanbia cauk ‘National Library of Malaysia’ ah a chiah

Kuala Lumpur — James Bawi Thang Bik nih Malaysia Chin ralzaam hna konglam cauk in a chuahmi ‘Rising Up: The fight for Chin refugees’ cu tuni ah National Library of Malaysia ah a chiah.

ACR (Alliance of Chin Refugees) zungah coordinator a tuan liomi kum 25 tlangval nih, “tuni cu lawmh loin ka um kho lo,” tiah a chim.

“Aruang cu keimah ka tuanbia le Malaysia Chin ralzaam hna kong ka tialmi ka cauk cu Malaysia cozah library ‘National Library of Malaysia’ ah ka chiah khawh cang.

“Malaysia cozah library ah chiah hmasa bikmi Chin ralzaam tuanbia cauk asi. ‘Chinmi hna Malaysia ram ah ralzaam dirhmun in kan um lio caan’ hi hmailei kan techin fapar hna nih hmu kho te hna seh ti ruahchannak in ka chiahmi asi,” ati.

A cauk onnak puai cu August 10 zingka 8:30am in zaanlei 4:30pm tiang Petaling Jaya Gospel Hall ah tuah ding REC 8th Anniversary and Carnival puai ah an tuah lai.

Mirangca in chuahmi cahmai 81-sau cauk cu Malaysia company ‘Gerakbudaya’ nih RM25 in a zuar piak cuahmah lio asi.

Cauk zuartu company nih 51% aa lak lai.

Gerakbudaya cauk dawr (Address: 2, Jalan Bukit 11/2, Seksyen 11, 46200 Petaling Jaya, Selangor) ah cawk khawh asi.

Online zongah [kahin] cawk khawh asi cang. Chinmi nih cun cauk chuahtu James [Facebook] sin zongah direct in cawk khawh asi.

A cauk kong tawifiang

13 June 2018 ah UNHCR nih ‘Chin ralzaam hna cu 2019 dongh tiang lawng ka zohkhenh cang hna lai’ ati ruangah Malaysia um Chinmi tampi hmailei nunnak kongah ruahchannak ngei lo le lungdong in an um.

UNHCR nih card chuh ruangah lungdong in Chin pa pakhat inn dot 13 cung zuangin aa that. UNHCR card ngeih ti lo ruangah Chinmi tampi rian phuah an tong.

Mah ruangah van raang tang Chin upa vialte i bawm in UNHCR biakhiahmi leetter an i zuamnak kong vialte a cauk chungah tling tein rel khawh asi.

Ṭial Lian Thang
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. The Chin Express dirh a duh caah 2017 ah RSC ah rian dinhnak ca a ap i ni fatin Chin thawngpang le vawlei cung thawngpang phunkip a ṭial.

Ṭial Tharmi