12.5 C
Hakha
Friday, April 10, 2020
More
    Ramkip
    1,511,104
    Zawtnak hmuhmi dihlak
    Ramkip
    328,661
    A dammi dihlak
    Ramkip
    88,338
    A thimi dihlak

    Israel Thimnak: PM Benjamin nih a hruai, nain cozah a ser kho lai maw ti a fianglo

    Ṭial Tharmi

    - Advertisement -

    Jerusalem — Israel ram cu atu hi an buaithlak chiahru. Kum 1 chungah voi 3 bak thimnak an tuah cang. Atu hi avoi 3nak thimnak vote an rel liopi asi. Liamcia voi 2 cu 2019 April le September ah an tuah.

    Zei party hmanh nih cozah an ser khawh lo caah thla 11 chungah voi 3 bak thimnak an tuah hi si. Israel Rampumpi Hlutdaw (Knesset) ah MP ṭhutden 120 um. Cozah ser khawhnak ding ahcun MP 61 cung ngeih a herh.

    Nikhatni (March 2) ahkhan Israel mipi nih vote an thlak i Thimnak Tolreltu Zung nih vote 90% a rel cang. Atutiang ahcun Prime Minister Pu Benjamin Netanyahu le a ṭanṭi party pawl nih MP59 an ngah cang, nain cozah tlaih khawhnak caah a herhmi MP 61 an ngah rih lo caah cozah an ser kho lai maw ti a fiang rih lo.

    Pu Benjamin, kum 70 nih cun nizaan ahkhan “kan party nih teinak kan hmuh cang, ka nun chung ah a ngan bikmi teinak kan hmuh…” tiah thawngthanhnak a tuah i a ṭanhtu mipi nih “Bibi, Israel Siangpahrang” tiah au in an lawmhpi len cang, nain a fiang taktak rih lo.

    Teinak kan hmuh, tiin thawng a thanh lio

    A zuamcawhtu pa hi Israel ralkap bawi hlun Pu Benny Gantz, kum 60 asi. Blue and White party hruaitu asi. “Pu Benjamin thlaknak dingah asi khomi paoh ka tuah dih lai…” tiah ṭanhtu mipi bia a kamh ve hoi hna.

    Atutiang vote an relmi result

    • Likud party (Pu Benjamin party): 36 MPs
    • Blue and White (Pu Benny party): 32 MPs
    • The Joint List party: 15 MPs
    • Shas party: 10
    • UTJ: 7
    • Yisrael Beytenu: 7
    • Labor-Gesher-Meretz: 7
    • Yamina: 6 

    Likud, Shas, UTJ le Yamina hi Judah biaknak a ṭanh taktakmi ruahnak khat pawl an si hna i a ṭangṭimi party an si. An dihlak MP ngahmi fonh cun 59 asi cang. Cozah tlaihnak dingah MP 2 an herh rih.

    Likud party biachimtu nih, “a kan zuamcawhtu Blue and White party MP pawl kan sawm hna lai i MP 61 cu kan tlinh te ko lai,” tiah a chim.

    Zuamcawhtu Pu Benny Gantz (Blue and White party hruaitu)

    Likud party nih cozah a ser khawh ahcun Pu Benjamin nih voi (term) 5nak Prime Minister a ṭuan lai. 2009 in atutiang Prime Minister a ṭuan. Israel tuanbia ah kum saubik cozah hruaitu Prime Minister a ṭuanmi si.

    Pu Benjamin cu ziknawh ei, laksawng cohlan le ka ṭhatnak ṭial hna seh tiin Israel media pawl cozah bawmhnak dollar million tampi a pek hna tiin sual an puh i tazacuai an timh lio asi. March 17 ah biaceih an timh.

    Israel Prime Minister a ṭuan liomi biaceih an tong bal lo. March 17 ah an ceih khawh tak ahcun hmasa bik si lai. Amah le a ṭanṭi party pawl nih cozah an ser khawh ahcun biaceihtu le palek bawi thar an thim lai i biaceih nithla an ṭhial te khawh men, tiah lunghrinh asi.

    Charhchan: Reuters le The Jerusalem Post

    Nawlnak: Kan website chung ca hi website dangah copy piak lo dingin kan in nawl hna.
    Tial Lian Thang
    Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.