IRC nih ‘Trump acozah refugee lak ngol timhmi’ a lungtlin lonak cathanh chuah

New York — IRC (International Rescue Committee) nih, “Trump acozah nih hmai kum 2020 ah refugee pakhat hmanh lak lo dingin khua a ruah lio si, timi thawngpang nih Americans vialte a lauter dih hna lai,” ati.

Kan hnu zarh ahkhan President Trump cu ruahnak petu pawl nih “hmai kum 2020 cu refugee pakhat hmanh la ti hna hlah” an ti.

“Trump acozah nih a fehter ahcun, ram thumnak kal nih a nunnak a khamh ding hartong pawl caah khuacimui asi ko lai.

“Trump acozah nih khuatlawng a kham cang hna, phungninglo ralzaam soknak a khar, chungkhar a tthen hna, ngakchia thong a thlak hna. Atu ah ‘American nunphung a simi himnak le caanttha pek’ hlawt dingin khua a ruah rihmi hi cu apoi chiahru.

“Mah policy pawl nih hin, zohkhenh a herhmi hna caah hmurka phak lo tiang tuarnak fak an chuahter cang.

“Atu bia kan chim lio zong ahhin, IRC rianttuan pawl cu Syria, Yemen, El Salvador, US ramri le vawlei cung hmun zakip ah hartongmi hna nih sining ttha deuh an ngah khawhnak hnga ttih ngei loin rian an ttuan cuahmah.

“White House nih ‘America ro asimi hrem tong pawl himnak pek’ a hlawt lio ah, Hlutdaw a hung dir. Ahoho nih president an ttuan zongah, Hlutdaw ah an chuahpi mi “Velngeihnak Upadi (The GRACE Act) nih harnak fak bik a tongmi ralzaam pawl caah American cu a rian a ttuanter tthiam lai.

“Hlutdaw ah Velngeihnak Upadi an chuahpi mi te nih hin ruahchannak a kan pek.

“Ralzaam le mipeem hna nih hin America sullam an ngeihter. US ralzaam laknak program hi minung nunnak a khamhtu le kan sang le veng a himtertu, a hlawhtlingmi hartong bawmh asi,” tiah IRC nih cathanh a chuah.

IRC lawng si loin, Refugee Council USA, US Committee for Refugees and Immigrants, US khrihfabu tampi i funtomnak bu Church World Service le adang NGO tampi zong nih an lungtlin lonak cathanh an chuah cio.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.