Indianapolis ah Kawlrammi mawttaw pah in a nunnak liam

US — Zahan tihni July 22 zingka 6:15am ah setbing aa citmi Kawlrammi pakhat cu mawttaw nih a pah i a nunnak liam.

Mawttaw mongtu le mit hmutu 2 nih CPR (a ttaang nam i kaa ah thaw pek) an tuah len ko nain chanh manh loin a hmun ah a nunnak liam, tiah palek nih an chim.

‘The Chin Voice’ timi Facebook page nih, “a thimi pa hi U Myo Myint, kum 73 asi,” tiah a ttial.

The Chin Voice: July 22 zing 6:15 am hrawng ah Indianapolis khuasa Kawl pa U Myo Myint, kum 73 hrawng cu SUV mawṭaw nih a pah i a hmun ah a nunnak a liam colh. Zeitin dah a pah ning si hnga ti hngalh si rih lo.

U Myo Miyint hi zingka tein a rianṭuanpi hawi Pu Rual Uk te inn ah saikel in a va kal tawn i an rianṭuannak hmun tiang Pu Rual Uk mawṭaw ai cit tawnmi a si.

Zahan i SUV nih a pah zong hi rianṭuan dingin Pu Rual Uk te inn lei i saikel in a kal lio a si lai tiah an zumh. 

Khrihfa cu a si lo nain a nupi he ICBC biakinn le Kawlholh in i pumhnak le Christmas tehna ah ai pum tawnmi an si an ti.

A ruak vuinak hi chungkhar lei nih rem an ti ahcun Indy Chin Khrihfabu le CCI nih ṭuanvo an lakpiak zumh a si.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.