14.5 C
Hakha
Tuesday, June 2, 2020

India ah ttihnung taktakmi thlichia a hrang lai, minung 800,000 deng an tthial hna

- Advertisement -
  • India ram nichuahlei i Odisha state ah thlichia fak taktak “Cyclone Fani” a hrang lai
  • Minung 1 million i dor kho dingin sianginn le cozah inn pawl an remh hna

Kum 20 chungah a fak bikmi “Cyclone Fani” thlichia cu India ram ah a hrang ding si caah nichuahlei rili kam khuasa minung ting 8 deng kan tthial cang hna, tiah India cozah nih tuni ah thawng a thanh.

Thlichia cu a pinh tuk ahhin suimilaam 1 ah meng 125 a phan kho lai. Thingkung a phur khawh lai, lo i thlaikheu a hrawh dih lai, electric sehzung, phone sehzung, inn le lam, tkb., pawl a hrawh khawh dih lai, a niam deuhnak hmun paoh ti nih a khuh dih lai, tiah Khuacaan Zohnak Zung nih a ruahdamh.

Thlichia Cyclone Fani cu rili cungin a hung hrang lai i thaizing chun hnu ah Hindu khua Puri a den lai i pawngkam khua le peng vialte zong a den chih dih lai, tiah India Khuacaan Zohnak Zung nih a chim.

A tthawng taktakmi thlichia nih a dennak ding hmun Odisha state i district 13 ah a ummi minung 780,000 cu zahan zaan ahkhan a him deuhnak hmun ah kan tthial cang hna, atu zong midang kan tthial thluahmah rih hna, tiah State Mipi Himnak Zung nih a thanh ve.

Sianginn le cozah inn 1,000 leng cu minung ting 10 (1 million) leng tlum dingin fek tein kan remh hna i ready in kan chiah cang hna, a ti.

Bangal Rili (Bengala Pin-Lay-Aw) ah thlichia cu aa ving len cang. Rili kam in meng 280 a hlatnak rili cungah thlichia aa huai lenmi cu cu-ttuh (satellite) in an hmuh.

Thlichia nih a dennak ding hmun pawngah a ummi states 2; Andhra Pradesh le Tamil Nadu zong ralring le thinphang taktak in an um.

India ram nichuahlei cu April le December thla kar ah thlichia in a den pah lengmang. 2017 zongah, thlichia Cyclone Ockhi nih Tamil Nadu le Kerala states hna ah minung 250 deng a thah hna i adang 600 leng an rak tlau. — NDTV le BBC English


- Advertisement -

Ṭial Tharmi

Ramdang khrihfa nih ACR sin in Chin ralzaam tampi an bawmh hna

Dawtnak ngei ramdang khrihfa pawl nih Malaysia um Chin ralzaam tampi caah ACR (Alliance for Chin Refugees) sinah bawmhnak an pek, tiah...