Hrem a tongmi Chin pa Malaysia Myanmar Tanzung nih chanh dingin a kawl

Hrem a tongmi Chin pa Malaysia Myanmar Tanzung nih bawmh dingin a kawl

Malaysia ram, Pahang state i Cameron Highlands ah hrem a tongmi Asho Chin pa cu Myanmar Tanzung nih bawmh dingin kan kawl lio a si, tiah tanzung rianttuan nih an chim.

Asho Chin pa Mg Gyi hri in an tem i an hrem lio video cu kan hnu zarh ah Facebook ah an tar.

“Mah kong hi kan hlat lio asi i a umnak hmun kan kawl lio asi,” tiah Kuala Lumpur um Myanmar Tanzung in rianttuan zohkhenhtu U Aung Zaw Min nih a chim.

“Kum 19 a simi Mg Gyi cu rian kawlpiak tu puaisa nih Cameron Highlands ah rian a luh. Puaisa man pek dingin thla 6 hrawng a ttuan hnu ah rian tthial ai tim,” tiah Myanmar Tanzung nih a chim.

“Rian phuah ai timhmi cu a puaisa Mindat Chin pa nih a theih caah misual Mindat mino pawl tangka a phalh hna i a hremter hna,” tiah U Aung Zaw Min nih a chim.

“Myanmar Tanzung nih bawmh kan duh” ati nain Nikhatni tiang ahcun Malaysia palek sinah bawmhnak an halpiak rih lo. Atu an halpiak cang maw ti hngalh a si rih lo.

Rakhine state Minbya peng i Taungshipin khuate (Chin khua) ah a ummi Asho Chin tlangval Mg Gyi, kum 19 cu Malaysia ram ah kuli rian ttuan dingin a rami a si.

An hrem lio video ah, banhla kung haunak naam in an ah lio le pliers in an tuk lio hna a lang. Mg Gyi cu Kawl holh in ngaihthiam hal le ka hrem hlah uh tiin a aihram lio zong a lang.

Myanmar Tanzung he aa bawmmi Kepong Manlo Ruak Vui Bawmtu Bu lutlai U San Win nih, “Zarhpini kha Mg Gyi kawl in Cameron Highlands kan phan, nain lam hla tuk a si caah zeihmanh a konglam fiangin kan thei kho lo,” tiah a chim.

Thla fatin Kawlrammi 4,000 leng peng Malaysia ram ah kuli rian ttuan dingin an ra, kan hnu thla lebang cu Kawlrammi 8,000 bak Malaysia ah kuli rian ttuan dingin an kal, tiah Myanmar Rianttuannak Vuanci Zung (Ministry of Labour) nih a thanh.

Kawlrammi tampi cu puaisa bawmhnak in Thailand in phungninglo in an lut.

Liamcia zarh 2 chungah Malaysia luh ai tim Kawlrammi 80 leng Thailand palek nih an tlaih hna. — Myanmar Times

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.