Hong Kong actor Simon Yam cu tu zingka ahkhan dawr thar onnak puai pakhat ah bia a chim lio ah ruahlo piin mipa pakhat nih nam in a sawh.

Tuni ahkhan China ram, Zhongshan khua ah Beijing Easyhome store thar onnak puai an tuah i actor Simon Yam cu mileng lei biachim dingin an sawm.

Simon Yam (kum 64) cu puai tuahnak stage cung bia a chim lio ah mipa pakhat nih a va kai hnawh i nam in a sawhnak video cu online ah mi tam taktak nih an share.

Video chung ahcun mipa pakhat cu stage cungah a kai i a bawngbi zal in nam aa chuah i actor Yam a paw ah a sawh lio hmuh khawh a si.

Mipa nih nam in a sawh hnu ah Yam cu velh a timh len rih. Nain, Yam nih a hrial chih ve.

A tanglei ah a tthumi mipa zong an lau tuk. An awann theih khawh a si.

Namte sawhtu pa cu a hmun ah security nih an tlaih colh i palek sin ah an ap khawh. Zeiruang ahdah mipa nih hin Yam cu nam in a sawh ti a fiang rih lo. Palek nih kherhhleinak an tuah lio a si.

“Simon Yam cu a paw ah nam in an sawh, a ban zong ah nam ahnak hma a um. A hma cu a cei lo nain, sibawi te nih Zhongshan ah maw a siloah Hong Kong ahdah operation tuah a si lai ti an fehter rih lo. Lungfim tein sizung a phan i a hma cu an tuam khawh cang,” Yam i a manager Lester Mo Gee-man nih a chim. _ The Star