Hakha College ah ca a chim ding US sayama Amy Peddie

USA — Indianapolis khua um Southport High School sayama Amy Peddie cu Chin khualipi um Hakha College ah Mirang holh a chim lai.

“Cachimh Thiam Bik Laksawng” voi tampi a ngah cangmi sayama Amy Peddie cu Hakha College saya/ma he zong cachimh ning i ruah ttinak a ngei lai.

Anih hi Indianapolis um Perry peng sianginn pawl ah ralzaam le mipeem pawl Primary, Middle le High Schools ah kum 20 chung French holh, Mirang holh le Computer Applications a chim cang hna.

“University of Indianapolis ah French Chimh major in B.A. degree ka dih hnu kum 1998 ah Southport Middle School ah French chimh kai rak thok,” tiah sayama Amy Peddie nih a chim.

“2006 ahkhan Indiana University ah ka kai tthan i English Learner Certification ka lim. Atu hi vawlei cung ram 20 lengin a rami miphun kip cawh siangngakchia pawl ‘intermediate level English’ ka chim hna,” a ti.

“Sianginn ttin hnu paoh ah, English a cawngmi pawl pumpek in college sok ning le US ah scholarships sok ning ka chim tawn hna.

“Ka chimhmi pawl cu Indianapolis ah siseh, US ram pumpi level scholarships zong a ngahmi an um len. Board of Indiana Teachers of Writing chungtel zong ka si ve. Kum 2016 Southport High School Cachimh Thiambik laksawng zong ka ngah.

“Tutan US sianginn khar kar Ṭhal chung (June – August) cu Hakha College siangngakchia pawl US ram ah college an kai khawhnak hnga English, mahte in ca tuaktan ning (critical thinking), aphi kawl ning le a bubu in ca tuah ning va chimh ka duh hna.

“Saya/ma te he zong naihniam tein rianttuan tti le kumpi mah zat chungah cachimh ning kai lakmi tete zong va cheuhbauh ve ka duh hna,” tiah a chim.