14.8 C
Hakha
Monday, November 29, 2021

Hakha ah sianginn a kaimi Paletwa siangngakchia pawl cu sianginn khar caan ah an khua ah an tlung kho lai lo

Hakha khuapi ah sianginn a rung kaimi Paletwa peng siangngakchia pawl cu an khua i a cangmi ral ruangah sianginn khar caan ah khua tlun awk an ttha lo.

Hakha GTI sianginn ah a kai ve mi Paletwa peng siangngakchia Aik San Lin Aung nih “kan khua ah ka tlun lonak sau cang. Sianginn ka rak kaika ahcun ka tlung ko. Mah hnu cun ka tlung ti lo. Atu hi a kum 3nk ka kai lio si.”

“Tlunkalnak lam a tthat lo ruangah inn lei zong nih tlun an ka sianh lo. Kan theihhngalh chungkhat sinah an ka umter chung i hika sianginn kai cu harsetnak tampi ka ngei. Atu hi ka umnak chungkhat hna cu an rian a tlamtling lo. Khua ka chungkhar pawl zong dinei kongah lungrethei an si. Thilman a kai fawn i an harsa tuk,” tiah a chim.

Hakha khuapi ah sianginn a rung kaimi Paletwa peng siangngakchia pawl cu sianginn khar caan ah an khua ah kir loin an chungkhat theihhngalhmi sinah an um, cheukhat cu biaknak lei nih tawlrelpiakmi inn ah an um.

“Falam ah kan chungkhat an um i sianginn khar caan ahcun anmah sinah ka va um. Nikum sianginn khar ahkhan cun Hakha ah chikhat ka um. Rian ummi paoh ka ttuan. Sianginn khar chungah pa pawl cu a ummi rianpaoh ttuan in tangka kan kawl kho. Nu pawl tu cu khua an tlun khawh lo zongah rianhrang an ttuan khawh lo caah khua lei in an chungle nih an kuatmi te in an cal hna,” tiah Aik San Lin Aung nih a chimchap.

Cheukhat Paletwa peng siangngakchia pawl cu biaknak lei bawmhnak in sianginn a kaimi an si hna i, sianginn khar caan ah biaknak lei nih tawlrel piakmi inn ah an um i tlamtlin lonak tete a um ti a si.

Chin Christian University (CCU) ah sianginn a kaimi Salai Aung Lin nih “atu ral a cannak khua hi kan khua pawngte a si. Tuan ahcun kan hawile pawl he khua tlun kan i tim. Nain, atu thilsining ruangah kan tlung tthan lo.”

“Sianginn khar thok in sianginn ah ni 3 kan um. Mah hnu ah saya te nih an kan khanpiakmi inn ah kan i tthial. Mah inn a si lo tikah kan siarem lo. An kan umternak inn cu zeitluk in a tthat ko zongah mi hmaikhah lonak tete a um i tlamtlin lonak tete a um,” tiah a chim.

Hakha khuapi ah Hakha University, College, CCU le GTI pawl ah Paletwa peng in sianginn a rung kaimi siangngakchia 50 hrawng an um.

Myanmar cozah ralkap nih March 14 le 15 ah a pehpeh in Chin state Paletwa peng khuate 5 cu vanlawng in a kah hna i khuami 21 leng a thah hna, 30 hrawng a hliamh hna i inn tampi a hrawhpiak hna caah minung 1,200 hrawng cu tuni March 16 ah Sami khua lei ah an zaam.

Malaysia
2,623,816
Mizaw Hmuhmi
Updated on November 29, 2021 12:29 pm
Malaysia
2,527,052
A Dammi
Updated on November 29, 2021 12:29 pm
Malaysia
30,309
A Thimi
Updated on November 29, 2021 12:29 pm
Malaysia
66,455
Zaw Liomi
Updated on November 29, 2021 12:29 pm

Ṭial Tharmi