Chin state khualipi Hakha khua chungah kum 5 chungah zuu rit i a bubu in mi i velh, phone fir, motorcycle fir le mi inn baoh a karh tiah Khonumthung Burmese nih a ti.

Hibantuk thil thalo a tuahtu hi a tambik cu kum tlinglo mino tete an si hna. Mino tampi cu zuu din, kaw hnimh le phungninglo rihhaisii tlang an hmang hna.

Jacob Thang

“Hakha khuapi ah University zong a hung um ve cang i siangngakchia nih phungningloin rithaisii tlang an zuar i a hmangmi tampi an um tiah thawng kan theih”.

“Cun, khap lomi kawbu cu tleirawl pawl nih an hnimh. A poi tukmi cu, kaw an hnimh tikah an lungthin aa thleng, an rit hnu cun mihrut bantuk in ttih an hngal ti lo, an duh paoh in an um, an buai. Cucaah, atu lio Hakha thil sining hi mino caah thinphang ngai a si”.

“Zuu le rithaisii an rit ruangah accident an tong i an nunnak liam. Cu lawng siloin, mi an va pahmi tiang zong an nunnak liam. Accident ruangah atu le tu sizung a phanmi hi zuuri tambik an si,” tiah Chin Civil Society Network chungtel Jacob Thang nih a chim.

Za Lian Thang

Salai Za Lian Thang nih “atu lio upadi ningah kum tlinglo ngakchia cu thongthlak an ngah lo. Thil fir le inn baoh ruangah tlaihmi mino pawl cu palik sakhan kalpi zongah thongthlak an ngah lo tikah a buai thlak taktak”.

“Hmailei ahcun ngakchia hna caah INGO le Zatlang bu hna nih upadi ningin nih fak piin dantatnak tuah hna sehlaw hi bantuk thilthalo tuah cu a tlau kho ko lai,” tiah a chim.

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.