Federal Australia Cozah Thimnak Le Australia Chinmi Dirhmun – Part 1

Federal Australia Cozah Thimnak Le Australia Chinmi Dirhmun- Part 1

April 29 thok in Polling station an on i vote an thlak cuahmah cang. Thimnak a nithla taktak cu May 18 a si. April 29 a nikhatnak ah vote a thla cia mi hi 1,10,000 hrawng an si manh.

Tukum cu kum dang nak in minung tam deuh nih vote an thlah lai tiah zumh a si. Caan sau pi Australia ram ramkhel a uktu le a nenhtu bik party lian hna cu party hme tete dirka mi nih an van en/nam chih thluahmah hna. 2019 Australia thimnak cu party pakhat lawng nih Cozah a ser kho lo men lai ti tiang in ramkhel lei thiamsang mi nih an zumh ngai.

Asiah, Australia rammisinak a la cang mi kan Chinmi hna hi teh a ho dah vote an pek lai? Miphun dang sin ah barawh zat te lawng a si mi nih kan ngei chun mi vote hi a ho dah kan pek lai ti cu ruah lo awk a tha lo. Asinain, vote pek cu mah le hmuhning le ruahning le biakhiah ning hoih in a kal awk a si. An policy theih hnu ah vote pek hi a tha bik. Khah an policies pawl kan zoh ta hna lai (tawi tete in ka tial lai)

I. Liberal Party Le An Policy Dirpimi Pawl

1. Ram pumpi economy ser hi an i hmaithlak peng. Rian ser le small business hi thazang a pe peng mi an si ti cu ram pumpi theih a si.

2. National Security hi kan mah lawng zumh ding kan si. Ram hi kan kut tang ahcun him tein kan chia khawh deuh ti hi an biatung pakhat ah a cang ve. 

3. Ralzam communities pawl he peitlai hi an huam ngai. An Party policy pakhat zongah an ser. Asinain, an tuah ser mi ai dang ngai theo. 

4. Ram hriamnam ser le thawnter an timh peng lai. An i uan thlarnak pakhat a si ve. 

5. Khrihfah mi sinak hi fak piin kan dir pi ko an ti lio ah an Prime Minister pakhat pa hna cu neih khat thitumnak lei ah a tang huar. Prime Minister tiang an thlak beh. Khrihfa lei ah conservative cu an si ko. Ruah cio an si ko nain nihin ni an dirhmun cu bia hal ding a tam ngai ngai.

Liberal Party Ruangah Chinmi Nih Kan Tem Cuahmahmi Thil Pawl

Liberal chung ah hin MPs cheu khat hna cu ralzam a hua/rem lo mi an tam tuk ve caah ralzam laknak zong tampi an karh ter duh lo.

Ralzam pawl caah funding zong cei lak an tan. Cu lawng hlah, ralzam pawl rammisinak (Citizenship) kong zongah a hleibik in Chinmi nih kan tuar khun.

Lungfak ngai in Chinmi nih citizenship soknak ah kum 2 leng kan hngah lio ah miphun dang TuLuk le India cheu khat nih cun thla 8 le kum 1 hna ah citizenship an ngah lawng hlah ceremony tiang in an dih.

University kai mi, secondary sianginn tanglei hngakchia sii ai lei zohkhenhnak le mipi sii ai thlopbulnak lei ah funding an cik mi pawl hi a tam ngamsam.

Cucaah, Victoria State ahcun an huat ning hna a fak tuk caah State election zoh ahcun Labor nih fak tuk in a tei.

II. Labor Party Le An Policy Dirpimi Pawl

An campaign policy pawl hi a tam tuk deuh caah a lian deuh mi le a lar deuh mi lawng ka tial lai.

1. An party a hram pi hi working class (rian tuan mi) caah dir hi a si. Riantuan mi thlahloh kai hi bia tak tein an auh i an tuah fawn lai. 

2. Sianginn, University, hospital le adang sii ai thlopbulnak pawl hi funding a kai ter lai. TAFE hi a tam khawh chung tam in FREE in a ser lai. 

3. Climate change (khuacaan ai thlennak) kongah fak piin ACTION ka lak lai ti a si (mah hi rampi economy kong he ai peitlai caah pricing le cost zei tluk dah tangka a dih lai ti cu fiang in an chim duh rih lo – a buaibai ngai mi le Liberal pawl nih caantha lak in an dennak point pakhat a si ve). 

4. Ralzam laknak a kar ter lai. 18750 in Liberal Cozah nih a lak mi cu 32,000 cap ah a kai ter lai. 

5. 2013 tiang ahcun ralzam le mipem communities pawl he chawnh biak hi an policy ah an ser lo nain 2019 thok cun bia tak tein peitlainak an ser pin ah community language program ca tiang funding ka pek lai a ti. Mah hi kan mah bantuk Chin miphun caah a tha kho taktak mi a si. 

6. Liberal Cozah nih ning le cang loin CentreLink hmang in robot (seh leiba cawhternak) a hman mi hi kan hrok colh lai an ti. Kan Chinmi minung tam taktak an i mih manh.

7. Childcare (hngakchia zohkhenhnak le Pensioner zohkhenhnak a kai ter lai). 
Childcare riantuan mi ca lawng siloin fa le Childcare chiah a duh mi caah awl zaang 
deuh a si pin ah kan nu/pa le hna kumkhua upa caah a tha ngai lai. 

8. Negative Gearing a hroh lai. Thla 7 chungah kan hrok lai an ti. Inn man a tlai dih colh lai. Asinain, inn hlan man bal te fak taktak in a kai kho colh ve. (Mah ka zawn hi an buai kho taktak. Rampi economy a hnursuan dih lai an 
ti i Liberal pawl nih bia tak thlak tein an doh)

Note: An party pahnih in policy vialte tial dih ding cu a tam ngai caah mah hi kan Chin miphun caah ton ding mi (impact) a um kho bik mi a si tiah ka ruah mi pawl deuh lawng ka langhter. Mirang holh a thiam mi ca cun an party pahnih website ah an policy pawl cu tha deuh in rel khawh a si .

Cattialtu: Sang Hre (Australia)

Part 2 peih than ding…….