Manipur tiva ah a paammi ngakchia 2 ruak an hmuh cang
Hmanthlak: Zalen

Falam khua pawng i Manipur tiva ah a paammi pa ngakchia 2 ruak cu tu zingka 6am le 8:30am ah an hmuh cang hna, tiah tunai te ah thawng kan theih.

Tualzeh khuami pakhat nih, “Van Nei Piang, kum 14 ruak cu tu zingka 6am ah ti a tlaknak thlang i paih kan zammi ah kan hmuh. Lal Rin San, kum 13 ruak cu ti a tlaknak pawng ah amah tein aa hung vuan,” tiah a chim.

Lal Rin San, Van Nei Piang, San Te (kum 16) le San Te apa Pu Van Run Piang hna cu Manipur tiva ah nga an kawl.

An ttin lei ah ti an i lio hna. Mah lio ah ngakchia 3 cu tiva chungah an tla. Pu Van Run Piang nih San Te cu a khamh khawh nain adang 2 cu a khamh kho hna lo.

Zahan zaanlei 2pm hrawngah ti chungah an tlak hi si.

San Te cu a rannak in khuami pawl thawng a va thanhter hna i upa minung 60 leng nih zaan khuadei meifar le dahmei he tiva kam in ruak aa vuanh an hngah.

May 1 zongah sianginn khar kar nuamhnak a kalmi ngakchia 3 cu Manipur tiva ah an rak paam. — Zalen