David Beckham thla 6 chung motor mong lo dingin an kham

David Beckham thla 6 chung motor mong lo dingin an kham

London — England bawlung chuih minthang taktak a rak simi David Beckham cu mawttaw mongh pah in phone a hman caah thla 6 chung mawttaw mong lo dingin biaceihzung nih dan a tat.

Manchester United le Real Madrid club ah a rak chuihmi David Beckham nih “ni kum November thla ahkhan London khuapi ah motor kai mongh pah in phone ka hman tak ko” tiin aa cohlan hnu ah thla 6 chung mawttaw mongh an kham hi si.

Kum 44 pa cu Bromley Magistrates Court nih acunglei bangin a tuhmi theipar a zunter hi si.

Khuaruahhar tiangin free-kicks a thiam ruangah a minthangmi pa cu England team hruaitu/captain voi 59 bak a rak ttuan. World Cups zongah voi tampi a rak goal. 2009 ah ramkip (international) bawlung chuih in ai din.

Club football zong in 2013 ah ai din lawlaw. Ai dinh hlan deuh ah; LA Galaxy, AC Milan le PSG hna ah a rak chuih.

Atu cu Miami khuapi ah Major League Soccer (MLS) a dirh liopi a si.

England pop music minthang Spice Girls ah aa rak telmi le hnu ah fashion designer minthang taktak ah ai chuahmi Victoria Beckham he an i um. — Reuters

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.