15.1 C
Hakha
Wednesday, September 30, 2020

Dal Mun Mang thihnak kongah University siangngakchia pawl lam an zawh

- Advertisement -

Kalay Technological University ah Mechanical Power kum 5nak a kai liomi tlangval Dal Mun Mang thihnak kong he pehtlai in Kalay sizung rianngeitu pawl dantat piak dingin Kalay University kip fonh in siangngakchia 3,000 leng nih February 10 ah lam an zawh.

Dal Mun Mang cu January 26 zaan ah motorcycle accident in Kalay sizung ah emergency mizaw in a phan nain ttuanvo a latu ding (guardian) an um lo tiin sizung rianttuanmi nih an thlop colh lo. Sml 9 leng an chiah sawhsawh ruangah a thimi a si tiah siangngakchia pawl nih an chim.

Cu kongah, cozah lei nih Kalay sizung ttuanvo ngeitu pawl cu dantat piak dingin University siangngakchia pawl nih lam zawh in an hal hi a si.

“Rianrang in zuanhnawh a haumi mizaw a daihthlanhtu sibawi le nurse pawl cu dantat piak dingin kan hal i ni 5 chung ah cozah lei le aa pehtlaimi Vuanci Zung nih dantatnak an tuah lo ahcun kanmah lei nih a herh ningin lehrulhnak kan tuah lai” tiah Mara Student Association hruaitu Wai Naing Oo nih a chim.

Lam zawhmi siangngakchia pawl cu Kalaymyo Seik Kan Thar lam in Pinlong lam le Bogyoke lam lei ah an kal i Kalay sizung hmai ah siangngakchia hruaitu pawl nih sizung kip ah mizaw hna hi dawtnak thinglung he ttha tein zohkhenh hna ding, ningcang loin rian a ttuanmi sibawi le nurse pawl cu fak piin dantat piak ding, sizung ah emergency mizaw thlopnak tangka a zatawk chiahpiak ding le cozah nih mizaw zohkhenhnak caah budget a tlawmbik 10% tiang chap ding timi pawl an hal.

“Kalay sizung nih Dal Mun Mang pakhat lawng a daihthlanhmi si lo. A hlan lio ah mizaw bawmhnak kan tuah lio zong ah a um bal cang i sizung an chanbaunak kong kan chim hi a sau ngai cang” tiah Kalay Peace Network in U Myo Zaw nih a chim. – Khonumthung

- Advertisement -

Ṭial Tharmi

Ramdang khrihfa nih ACR sin in Chin ralzaam tampi an bawmh hna

Dawtnak ngei ramdang khrihfa pawl nih Malaysia um Chin ralzaam tampi caah ACR (Alliance for Chin Refugees) sinah bawmhnak an pek, tiah...